EDITORYAL - Palma misugo, magtiyaon manganak og daghan

Pintok kaayo ang mando  ni Arsobispo Jose Palma  nga kutob  sa magtiayon  nga  gustong  manganak  og  daghan kinahanglang  motuman  niini  sa way kahadlok  sa RH Law.

Matud  pa  sa iyang  wali  atol sa pista  ni Sto. Niño niadtong  Domingo  uban  sa gipahigayong  Sinulog , iyang  gipalanog  nga angay  gayud  nga  magdaghan  ang  mga  bata  dinhi  sa nasud.

Kini  sa usa  ka katarungan  nga  ang  bata  maoy  mohatag  og  kalipay  sa mga  ginikanan  ug  mao  usab  ang  gipangandoy  kuno  ni  Sto. Niño  nga  kinahanglang  padaghanon  gayud ang  mga  bata  dinhi  sa Pilipinas.

Kay ang  mga magtiayon  nga dyutay ray anak sama  sa usa, o kaha duha,  pirme lang magluya kay  mingaw  kaayo  ang balay  nga dyutay ray bata.

Sa maong  wali, gidayeg  pag-ayo  sa arsobispo  sa Sugbo  ang  mga  magtiayon  nga  mga  Filipino  kay  nakakat-on  kini  sa pagpadaghan  sa anak  lahi  sa ubang  nasud  sama  sa China  nga  misagop  nianang  One Child  Policy.

Tungod  kay sa China  wa  didto  sa Sto. Niño, nga maoy  nangandoy  nga kinahanglang   padaghanon  ang  mga  bata.

Busa  mao na  kini  ang  gipaabot  sa mga magtiayong    Katoliko  nga  may  moayuda  kanila  sa  pagpadasig  sa  pagsupak  sa RH Law.

Kay  sa  RH  Law, itudlo  man  sa goberno  ang  mga  paagi  ug sistema  aron  makapugong  sa pagpanganak  ang  magtiayon  nga  di mahimong  criminal.

Kini  pinaagi  sa pag-edukar  sa  mga  magtiayon  bahin  sa paggamit  og  mga  kontraseptibo  nga  ihatag  sa goberno  kanila  nga  libre  nga  di  makapaturok og bata  sa ilawom sa tagu-angkan  sa inahan, busa way  ma-abort  o mahilog  nga bata  ang  mga abortionist kay wa may sulod  nga bata ang  taguangkan sa inahan.

Apan matud  pa ni Arsobispo Palma  nga  di  kini angay paminawon  sa  mga  magtiayon  kay  gikinahanglan   nga  modaghan  ang  populasyon  sa Pilipinas.

Sa pagkakaron  mikabat na  sa 95 milyones  ang  populasyon  sa nasud  ug  ang  pagpangugat  sa  kagamhanan  nga  mokalma  og  dyutay  ang  pagtubo  niini  pinaagi  sa RH  Law, lisud  kaayong  mosaler  tungod  kay  80 porsiyento  sa populasyon  karon , mga  magtiayon  nga  Katoliko.

Mas  dili  pa sila gabaan  sa  pagsupak  sa RH Law  kay  sa sugo  ug mando  ni arsobispo Palma.