Si Gwen lang ba ang abusado?

Halos ang tanan kun dili man ugaling ang tibook kalibotan mikondinar ug mibiay-biay sa suspendidong gobernadora sa lalawigan sa Sugbo nga si Gwendolyn Garcia tungod sa iyang pag-abuso sa katungdanan. Apan si governor Gwendolyn Garcia ba lang ugod ang abusado sa iyang katungdanan nilang tanan nga mga naglingkod ug mga piniling opisyal sa lalawigan sa Sugbo?

Sa dili pa ta hingpit nga mabuta sa kamatuoran tugoti nga atong balikan ang kasong gipasaka ni kanhi bise gobernador Gregorio “Greg” Sanchez batok sa gobernadora kaniadtong tuig 2010.

Kun nakahinumdom pa mo, ang bise gobernador nga si Greg Sanchez mipasaka og kasong abuse of authority batok kang gobernadora Gwendolyn Garcia tungod sa paglaslas sa pundo sa iyang opisina, pagdili kaniya sa pag-renew sa trabaho sa iyang mga kawani ug consultant ug pagsira sa publication sa iyang opisina. Pero niining tanan, ang gikasakit gayod pag maayo sa bise gobernador mao ang paglaslas sa pundo sa iyang opisina tungod kay iyang gibati ba kaha nga gipiangan siya ni governor Gwendolyn Garcia.

Apan ang paglaslas sa pundo sa opisina sa bise gobernador gitugotan sa kinatibuk-ang sakop sa junta probinsiyal pinaagi sa usa ka resolution nga ilang gipalabang ug usa na sa mitugot niini mao ang acting gobernador karon nga si Agnes Magpale.

Karon ang gobernadora suspendido tungod sa iyang pag-abuso sa katungdanan nga may pagtugot sa junta probinsiyal. Ang akong pangutana, kun ang pag-abuso sa katungdanan may silot, nganong ang gobernadora man lang ang gisilotan pinaagi sa pagsuspenso kaniya sa katungdanan? Nganong wala man apila sa pagsuspenso ang mga sakop sa junta probinsiyal nga maoy nagtugot kaniya sa pag-abuso sa katungdanan? Kun buot huna-hunaon mas abusado pa gani kay sa gobernadora ang mga sakop sa junta probinsiyal tungod kay sila ang naghimo sa gobernadora nga abusado sa iyang katungdanan.

Kun atong palawman ang atong pagsabot, dili si gobernador Gwendolyn Garcia ang milaslas sa pundo sa opisina ni kanhi bise gobernador Greg Sanchez kun dili ang iyang mga kaubanan karon sa partidong Liberal nga mga sakop sa junta probinsiyal. Ang gihimo sa gobernadora mao lamang ang pagpatuman sa resolution nga gipalabang sa junta probinsiyal nga naglaslas sa pundo sa opisina sa kanhi bise gobernador nga si Greg Sanchez. Kun abuso man ugaling sa gahom ang gihimo sa gobernadora nga igo lang mipatuman sa resolution nga gipalabang sa junta probinsiyal, mas labaw pa segurong miabuso sa ilang gahom ang mga sakop sa junta probinsiyal nga mao gayod ang nagpalabang sa resolution.

Sa Kapitolyo dili lang si gobernadora Gwendolyn Garcia ang abusado sa gahom, may mas labaw pa niyang abusado ug kana mao ang mga sakop sa junta probinsiyal seguro niini lamang kasoha.