Bagulbol
Nagbagulbol ang daghang mga molupyo ning dakbayan sa Sugbo tungod sa basura nga wala makolekta.
Gawas nako laing nagreklamo mao ang akong kanhi boss nga si Marit Stinus Cabugon tungod kay tunga sa buwan na nga wala mahakot ang ilang basura didto sa Forest Hills sa Banawa.
Atol sa among panaghinabi pinaagi sa Facebook sa miaging semana dul-an na sab sa duha ka semana niadtong higayona nga wala makolekta ang among basura sa Barangay Kalunasan.
Samtang nag-chat mi ni mam Marit niabot ang trak nga mihakot sa among basura.
Dihang akong giingnan si mam Marit nga at last niabot na ang mohakot sa among basura puno sa kasina ang iyang tubag nako nga nagkanayon, " good for you".
Matud niya nga giingnan sila sa mga tinugyanan sa ilang barangay nga guba ang ilang mga trak sa basura.
Sunod nga mga adlaw nigawas sa mga mantalaan ang report nga di lang diay kami ang nagreklamo sa basura kun dili ang hapit tanang barangay.
Apan tubag sa dakbayan sa Sugbo sa problema mao ang pamasangil batok sa Bando Osmeña Pundok Kauswagan kon BOPK nga gituyo niini nga dili kolektahon ang basura aron mauwawan si Mayor Michael Rama sa mga bisita karon dinhi sa dakbayan.
Pastilan, kinsa man diay naglingkod ron sa pwesto?
Nganong dili man angkunon ni Rama ang problema inay nga ipamahid sa iyang kontra sa politika.
Ang pagpamahid sa problema sa imong kontra bisan ikaw maoy dunay dakong responsibilidad niini nagpaila ni sa imong kainutil isip lider.
Matud sa mga kapitan mao nga ang nahitabo dili makasugakod ang ilang mga gubaon na nga mga sakyanan paghakot sa basura mao nga inigkaguba magtipun-og ang kolektahonon.
Mao na ni ang akong giingon kaniadto pa nga ang problema mao ang kakuwang ni Rama sa paglatid sa hustong prioridad sa iyang administrasyon.
Kun ang minilyon ka pisos nga gipamalit ni Rama og brandnew nga mga luxury vehicles alang sa iyang mga kaalyado sa politika iya pang gipalit og trak sa basura dili unta mag-antos ang mga magbubuhis sa kabaho sa wala makolekta nga sagbot.
Unsaon mas importante man sa mayor ang iyang reelection mao nga giuna ang pagpanuborno sa mga kapitan aron pagsiguro sa ilang suporta.
Mao ba ni ang pasalig sa mayor nga pagtul-id sa hiwi dihang siya milingkod sa pwesto?
Tataw nga pagpahimulos sa kwarta sa gobyerno ang iyang gihimo sa way kukaikog sa mga magbubuhis nga maoy nanag-iya sa bahandi nga iyang giwaldas.
* * *
- Latest
