Lamok-lamok

Matag buwan sa Enero ipahigayon ang prosisyon sa Jesus Nazareno kinsa nailhan sa kadaghanan nga Black Nazarene didto sa Manila. Mahal nga Patron kini sa Parokya sa Quiapo.

* * *

Matag Enero usab ipahigayon dinhi sa Sugbo ang prosisyon ni Sr. Sto. Niño ang pinanggang Patron sa tibuok Sugbo.

* * *

Kadtong mga nakakita sa prosisyon sa Nazareno sa TV makaingon gayud nga lahi kaayo ang matang sa maong prosisyon kun itandi sa atong Sto. Niño prosisyon.

* * *

Nagyagaw ang libuan ka mga debotos nga nangapil sa prosisyon. Mag-inilugay sa pagkatkat sa karo aron mopahid sa ilang panyo o gamay’ng tuwalya sa imahen sa mahal nga Nazareno Hesus.

* * *

Tungod niini nawa ang kasolemne sa okasyon. Lahi ang prosisyon sa Sto. Niño. Pormal nga nanglakaw ang mga libuan usab ka mga debotos ug nangadye samtang nanglakaw. Solemne kaayo. Prosisyon gud.

* * *

Bisan mismo ang mga taga Manila nga nanan-away lang sa Nazareno nga prosisyon nahisaway sa pamaagi sa prosisyon sa Quiapo. Daghan ang nahibong nganong gitugot man sa Parokya ang lamok-lamok nga prosisyon sa ilang Patron.

* * *

Kining ato obserbasyon ug komentaryo lang. Kun medyo dunay pagsaway kana tungod kay ang naandan tang prosisyon solemne man. Wala’y lamok-lamok. Diin ang pipila sa mga debotos nangaangol.

* * *

TRIVIA. Pit Senyor sa atong mga higala diha sa Mandaue ug Lapu-Lapu. Daghang salamat sa nagpadayon ninyong suporta sa Banat News.