PNoy labing gamhanan nga presidente

Si US Pres. Barack Obama ug Vice Pres. Joe Biden opisyal na gayud nga re-elected sa ilang tagsatagsa ka mga posisyon.

Gihimo kining maong deklarasyon ni Bise Presidente Joe Biden, nga mao usab ang senate president, human maihap ang electoral college's votes sa 50 ka states ug sa District of Columbia sa joint session of congress niadtong Enero 4.

Sigun sa US constitution, ang 538 ka mga electors (332 ka mga representante ni Obama ug 206 kang Mitt Romney), mibotar sa ilang tagsatagsa ka mga state- sa Lunes sunod sa ikaduhang Miyerkules sa bulan sa Desiyembre (Dec. 17) human sa presidential election nga gihimo sa adlaw'ng Martes sunod sa unang Lunes sa buwan sa Nobiyembre.

Gipangandaman na ang ikaduhang pagpanumpa ni Pres. Obama ug VP Biden karong Enero 20. Ang ilang inugurasyon himoon sa mosunod nga adlaw pinaagi sa usa ka dakong public ceremony didto sa Washington, D.C.

* * *

Si Pres. Noynoy Aquino mao ang labing gamhanang presidente sa tibook kalibutan.

Kini ang gisulti ni Sen. Gringo Honasan atul sa usa ka komperensiya sa pipila ka sakop sa media kalabut sa Freedom of Information (FOI) bill.

Sumala sa senador nga dili problema ang paghimo'ng balaud sa FOI kun sertipikahan kini nga urgent ni PNoy.

Pipila gayud ka adlaw nga nagsigi ako'g hunahuna kun unsay gibasihan ni Sen. Honasan sa iyang pamahayag labi na kay dili siya sakop sa Liberal Party (LP). Human sa pipila ka semana, natugkad nako ang posibling katarungan sa senador.

Akong nahinumduman ang pagkanaug ni Ombudsman Merceditas Gutierrez tungod sa pwersa sa Malacañang, pagpapriso kang kanhi presidente nga karon kongresista Gloria Macapagal Arroyo ug ang pagtangtang kang Supreme Court Chief Justice Renato Corona pinaagi sa maniobra sa mga kongresista ug senador.

Ang pagpasar sa Reproductive Health (RH) law nagpakita nga kontrolado ni PNoy ang mayoriya sa mga kongresista ug senador.

Dinhi ako makombinsir nga tinood ang pagtoo ni Honasan kay samtang ang pangulo sa adunahang mga nasud nga demokrasya sama sa Estados Unidos, Britanya ug Pransiya dili bastabasta nga makadiktar sa ilang kongreso ug parliament apan ang tingog ni PNoy dinhi gikahadlokan sa atong mga kongresista ug senador.

Daghan gani ang nagtoo nga kontrolado sa presidente dili lamang ang kongreso kun dili hasta ang hudikatura.

    Wala pa hinoon akoy nakitang grabe nga pag-abuso ni PNoy sa iyang gahum apan nahadlok ako niining panultihon nga "power corrupts and absolute power corrupts absolutely."

* * *

Nahadlok akong tungod sa gahum sa presidente maglisud ang court of appeals (CA) sa paghukom pabor kang suspended gov. Gwen Garcia. Daghan man gud nga paagi nga magamit ni PNoy batok sa mga tawo nga mopakgang sa iyang gusto. Mahimong mandoan niya ang Bureau of Internal Revenue (BIR) pag-imbistigar sa mga sakop sa CA apil na ang Garcia family.

Mahimo usab tingali niyang ipadali sa Sandiganbayan ang pagpakanaug og suspension order batok sa suspendidong gobernador sa iyang kaso sa Balili property.

Pwede usab nga dalion ang paghukom sa sumbong batok kang Garcia kalabut sa Cebu International Convention Center (CICC).

Sumala sa panultihon, "Daghang paagi sa pagpanit og iring."

* * *

Daghan sa akong mga higala ang nagbungol tungod niining isyu sa suspensiyon ni Gob. Gwen Garcia.

Inay nga kalma nga magdebati aron ipatigbabaw ang ilang mga baruganan ug katarungan ang kadaghanan kanila modumot gayud sa ilang kaatbang.

Subo kaayong palandungon nga ang mga managhigala dili na magtingganay tungod lang sa politika.

Lisud gyud diay sundon kining sulti sa maalamon nga, mahimong managsumpaki ang inyong baruganan apan kinahanglang imong depensahan ang iyang katungod sa pagsulti niini.

* * *

Laing biktima ning suspensiyon ni Gob. Garcia mao si Bobby Nalzaro nga nagsuwat og lindog sa Sunstar ug Superbalita.

Human sa 18 ka tuig nga pagsulat sa iyang kolum "Saksi" gisuspenso ang iyang pagsuwat sa maong mga pamantalaan tungod sa iyang pagsaway sa gihimo sa suspendidong gobernador sa pagpadayon og estar sa iyang buhatan sa Kapitolyo.

Gawas sa iyang columns inila usab siyang hard-hitting broadcaster sa RGMA Superadyo ug GMA TV 7.

Gawas sa kalibog sa mga empleyado napagan usab ang iyang anak ug mga pulis niining sitwasyon karon diha sa Kapitolyo.

Dili ba makaayo sa suspendidong gobernador kun mobiya siya sa iyang buhatan ug huwaton na lang ang hukom sa Court of Appeals sa iyang panimay?

* * *

Samtang atong gipaninguha ang pagdili sa pagamit og mga plastic apan nagpasad lang ang mga plastic bottles sa mga bottled water sa atong komunidad.

Didto sa Concord, Massachusettes, USA, gidili na sa ilang konseho ang pagamit sa mga non-sparkling ug unflavored drinking water nga gisulod sa plastic apil na ang bottled water. Exempted hinoon ang mga soft drinks.

Maayo nga estudyuhan kini sa atong mga konsehal ug mga kongresista isip usa ka paagi sa pagminus sa pagamit sa plastic.

* * *

Mga pahasubo ngadto sa pamilyang Kintanar sa pagpanaw sa kanhi Cebu City councilor, vice mayor ug Kapisanan ng mga Brodkaster ng Pilipinas (KBP) chairman Vicente (June) Kintanar, Jr. Ang iyang minahal nga kapikas, Lee Kintanar, akong nakauban nga anchor sa Station DYDY (Banahaw Broadcasting Corp.) panahon sa Martial Law.

Si anhing June, sama kang Lee, usa ka professional broadcast journalist. Condolence.

Email: [email protected]