Haskang tugnawa sa gawas. Mao nga dihang gidapit kong Thads Bentulan, kanhi maglilindog sa Business World, nga magkita mi sa Sham Shui Po, kabalibaron ko. Kay nakasuroy na ko didto ug nakapamalit na sa akong gidumtan nga electronic gadgets.
Wa hinuon kong kabalibad sa sunod niyang imbitasyon: Mangaon mi sa iyang natultolan nga tindahan nga nangluto sa labing lamian, labing gidugokan ug init kaayo nga sabaw sa bitin. Kay nakuryuso man sab pag-apil ang akong asawa, bisan way planong molili sa bisan unsang gadgets, nagkuyog mi paingon sa Sham Shui Po.
* * *
Gipahinumdoman nakong akong asawa nga ganahan na kong mokaon og bitin sa gamay pang bata. Dihang nagpuyo mi sa Isla sa Batalyon, sa Mandug, Davao del Sur, hapit matag adlaw nga mag-ihaw og dakong bitin ang mga trabahante sa asyenda sa mga Aboitiz. Kalasangan pa ang dakong bahin sa isla maong daghang bitin. Gipanitan nila ang bitin, gihiwa og dagko ug giluto nga susama sa linat-ang manok. Nisawo mi sa mga trabahante sa ilang mga panihapon nga bitin. Nga gidan-agan lang og mga sulo. Segun nila mas lamian ang bitin nga kan-on sa ngitngit. Di lang tingali sila ganahan nga mabantang namong mga bata ang grano sa karne.
* * *
Gilibot una ming Thads sa bag-ong gadgets nga iyang nakit-an sa way kinutoban nga mga tindahan sa computer center sa wa pa mi niya dad-a sa gamay’ng kan-anan kansang bugtong putahe mao ang sabaw nga bitin. Wa dayon ming kalingkod tungod sa kadaghan sa nangaon. Labihang inita tuod sa sabaw. Duha ra ka nag-awas nga panaksan (tag P200 matag usa) ang among gikuha kay ang akong asawa wa ganahi sa baho. Pino ang hiwa sa bitin. Gitanyagan mi og kagumkom nga bok chiu ug dahon sa lemon pagpapas sa langsi.
* * *
Gitandi ni Thads ang lami nga morang dabong sa kawayan. Ubang kustomer nitug-an namo nga matag tingtugnaw gyud silang mobalik didto. Ang palibot nalukop sa mga garapon ug botelya sa gipreserbar nga mga karne sa bitin. Wa mi pakit-a sa pag-ihaw sa bitin, nga mahimo lang sa mahalon nga mga kan-anan nga tag-P2,000 ang matag putahe. Human namo og kaon, gitanyagan mi og isog kaayong bino sa apdo sa bitin (tag P60 matag tasa). Dihang akong giyarok, morang natabas ang akong tutonlan.
Nanggawas mi pagpangita og laing dapit nga mas luwas ang pagkaon ug mas kalma ang baho alang sa akong asawa nga wa pay paniudto. Sa tibuok Sham Shiu Po, nga ang mga molupyo ug mga turista pulos baga ang gipanul-ob, kami rang Thads ang nanglakaw nga naghukas sa among jackets ug gipaningot.
* * *
Email: leo_lastimosa@abs-cbn.com.