Magpa-alkanse sa ganansiya

Sagad niadtong gusto magnegosyo o mamaligya, nga wa pa kaayo makatugkad sa tinuoray nga palakaw aning sistimaha, mahimo nga  naa sa iyang hunahuna mao ra gyud ang pagpokus nga makaganansya sa iyang baligya.

Apan nakamatikod tingali kita, nga may namaligya o nag negosyo, nga sa tantong paneguro sa tinguha nga makabaton og dakung ganansiya, na bankrap o naalkanse hinuon…..nga hasta ang puhunan nawagtang pa.  Ngano man kini?

Tungod kay wala sila masayod nga unsa man kadako sa ganansiya apan dili balanse ang gasto nga daku  pa sa ganansiya nga magdagan ang adlaw magkahilis usab ang puhonan kay permi gitapal sa inadlaw nga gasto.

Angay untang buhaton kun gusto kita molambo ang negosyo, kwentahon una kun pilay labing minus magasto matag adlaw. Unya maghimo sa’g kwentada nga doblehon ang ganansiya kay sa gasto. Ang sobra sa ganansiya human makuhai sa gasto, mahimong ipuno sa puhonan aron motubo ug magkadaku hangtud molambo na pag-ayo ang gitikad nga negosyo mo.

Aron sad di maapiki sa batakang gasto sa panimalay, angay mangitag paagi nga makab-ot gyud ang hamugaway nga ganansiya. Sama pananglitan nga minusan mo sa presyo o magpa-alkanse sa ganansiya aron daghan ang mamalit. Sa ingon modaghan sad ang imong halin, natural magkadaku usab ang imong ganansiya nga permi idugang sa puhonan aron mas modaku pa ang ganansya.

Sakripisyo sa daginot, kahago, pailob….nga ang kuwartang halin di hilabtan, ibutang sa panudlanan, di sa kamot o bulsa kay makuot nga di mamatngonan hasta ang puhonan naapil sa wala’y kapuslanang gasto hangtud na bangkarota.