Daghang salamat ninyong tanan

Wala lang mahibaw-i, walo na diay ko ka tuig sa akong pagpanibya sa DySS Super Radyo Cebu niining adlawa. Enero 3, 2005 sugod ninyong nadunggan ang akong tingog sa sibyaanan nga nahisgotan ko na sa unahan. Alang niadtong wala pa masayod, ang sibyaanan karon nga naghimo kanakong instrumento aron kamo maalagaran gipanag-iya sa Radio Global Media Arts o RGMA Network, ang Radio Network sa GMA 7.

Magwalo ka tuig na usab diay ning tuiga ang akong lindog ning inyong paboritong Banat News. Wa lang mahibaw-i walo na diay ka tuig ang milabay dihang gitawagan ko ni Sir Ryan Borinaga aron pasuwaton sa opinion page niining Banat News. Kun akong apilon sa pag-ihap ang akong unom ka tuig nga panibya sugod niadtong tuig 1998 hangtod sa tuig 2004 sa Bombo Radyo Cebu nga gipanag-iya sa Bombo Radyo Philippines Network mo-napulog-upat na diay ko ka tuig sa industriya sa media. Pastilan, dili gyod mahibaw-an ang panahon. Hinuon kun ikomparar sa uban nga nanggungis na sa ilang pangalagad sa media makaingon ta nga bayong-bayong pa lamang kita.

Pero dako gihapon kaayo ang akong pasalamat tungod kay wala gyod tawon ko magdahom nga makaabot ko niining maong gitas-on sa katuigan nga nakig-uban ako kaninyo sa kahanginan ug sa inyong mga gimbuhaton bitbit ang Banat News aron inyong mabasa ang akong lindog. Kinsa bay magdahom nga makaabot ko og napulog-upat ka tuig sa industriya sa media nga igo ra man tawon ko nga nasaag niining maong industriya.

Wala gyod tawon marehistro sa akong huna-huna kaniadto ang pagka magsisibya ug ang pagka kolumnista bisan tuod og nahimo akong contributor kaniadto sa among student publication sa College nga THE CAS QUILL sa Southwestern University. Pero karon bisan usa lang ka semana nga mawala ko sa akong tulumanon sa radyo mingawon na ko ug dili ko mahimutang kun dili ko makapadala sa akong lindog dinhi sa Banat News.

Kun nagpasalamat ko tungod kay nakaabot na ko og napulog-upat ka tuig sa akong profession sa media mas dako gayod ang akong pagpasalamat diha kaninyong akong mga readers ug listeners kay kun dili pa tungod ninyo dili nako maabot ang maong katuigan, busa gikan sa kinahiladman sa akong kasing-kasing ako mopaabot diha kaninyo sa dako kaayo nakong pagpasalamat diha kaninyong tanan. Usbon ko, DAGHAN KAAYONG SALAMAT.