Martial law sa Kapitolyo
Hapit na'ng semana sukad ipatuman sa Department of the Interior and Local Government kon DILG ang unom ka buwan nga suspension order batok ni Gobernador Gwendolyn Garcia.
Mo usa na sab ka semana nga nagpabilin si Garcia sa iyang opisina. Sulod sa maong gidugayon kaming mga wala pa makamatngon og buot atol sa martial law nahatagan og higayon nga masaksihan unsay talan-awon atol sa maong higayon pipila na ka dekada ang milabay.
Matud nila nga mas grabe pa sa martial law ang gihimo karon diha sa Kapitolyo tungod sa hugot nga siguridad.
Tanang tawo nga mosulod sa Kapitolyo kinahanglang mopakita og ID ug sukitsukiton sa kapolisan unsay ilang tuyo sulod sa compound.
Nganong kinahanglang buhaton ni sa kapolisan? Nalimot na ba sila nga ang Kapitolyo usa ka government building?
Dili man tingali kinahanglang mag-over acting ang kapolisan ug si kinsa may nagsugo nila niini.
Kun miinsister si Garcia nga dili mopahawa sa iyang buhatan, pasagdi hangtud kanus-a siya mapul-an og puyo diha sa iyang opisina. Wala man tingali kinahanglana ang physical gyud nga pagpapahawa ni Garcia aron makumpleto ang pag-asumir ni bise gobernador Agnes Magpale isip acting governor.
Imprastraktura lang ang giakupahan ni Garcia sa pagkakaron og wala na siya’y gahom paghimo sa naandan niyang gimbuhaton.
Dili na siya makahimo sa pagpamirma sa mga transaksiyon sa Kapitolyo ug labaw na nga dili na niya mamahimong hilabtan ang kaban sa Kapitolyo.
Busa aron malikayan ang tensiyon mas makatabang kun pasagdan lang una ni Magpale si Garcia hangtud nga mukanaog kini sa iyang kabubut-on.
Samtang dunay pressure sigurado ko nga di gyud siya mukanaog.
Alang ni Magpale maayo nga iyang badlongon ang iyang mga sakop nga nagsugod na sa paghari-hari ug pagpangabuso.
Dili maayo paminawon nga si Garcia gisuspenso sa Malakanyang tungod sa pasangil sa pag-abuso sa gahom apan ang gipuli labaw pa ka abusado.
Nitug-an nako ang pipila ka mga staff sa Sugbo TV unsay gihimo sa mga staff ni Magpale.
Matud nila nga gipangguba sa staff ni Magpale ang mga gamit sa cable channel sa probinsiya.
Gibaharan pa ang mga staff niini nga dili magpataka og post sa facebook sa nahitabo.
Lupig pa tinuod ang martial law sa nahitabo. Ang katapusan nako nga nahibaw-an nga gipasirad-an sa gobyerno ang mga estasyon nga wala nila maayoni niadto rang panahon sa diktador.
* * *
- Latest
