Wala mosaler nga diskarte

Sa katapusan, milusot na gayud ang kontrobersiyal nga Reproductive Health Bill sa duha ka chamber sa Kongreso. Ug pirma na lamang ni Presidente Benigno Aquino III ang gipaabot aron nga hingpit na kining mamahimong balaud.

Sa dili madugay mosulod na ang RH Bill sa buhaton ni Presidente Aquino alang sa iyang signature. Usa kini sa mga prayoridad sa presidente nga mapatuman sa dali nga panahon. Gani iya kini nga gi-certified nga urgent aron nga mapatuman dayon kini ug mapahimuslan sa katawhan.    

Dili gayud kadawat ang Simbahang Katoliko sa pagpasar sa RH Bill sa Ubos Balay Balauranan ug sa Senado sa niaging semana. Target niini karon kadtong mga magbabalaud nga mibotar pabor sa maong balaudnon.

Tungod lagi sa wala pagpanumbaling sa mga pro-RH lawmakers sa panawagan sa simbahan pagsalikway sa maong balaudnon, gusto sa simbahan nga panimaslan sila sa sunod nga bugnong lugaynon sa Mayo.

Pipila sa mga obispo ang nanawagan sa ilang mga sakop sa dili pagbotar sa mga magbabalaod nga mipabor sa RH Bill. Tungod sa ilang kapildihan, karong eleksiyon na lamang sila mamawi.

Apan kun epektibo ba ilang kampanya batok sa mga pro-RH lawmakers, ato lamang paaboton. Hinuon nagkinahanglan kining mga obispo og higante nga paningkamot aron mosunod kining ilang mga karnero.

Panahon sa piniliay wala mailhi ang Simbahang Katoliko nga adunay block voting, dili susama sa Iglesia ni Kristo nga maghiusa pagsuporta sa partikular nga mga kandidato. Naanad nang mga Katoliko nga adunay kagawasan sa ilang pagbutar matag piniliay nga layo sa renda sa mga obispo.

Hinuon dako akong pagtuo nga lisod nga mosaler kining panawagan sa mga kadagkoan sa simbahan sa dili pagbotar sa mga kongresman nga mipabor sa RH Bill. Kini tungod kay daghan usab sa mga katoliko ang mituo ug misuporta sa maong balaudnon nga adunay dakong ikatabang sa mga Pilipino.

Sa akong tan-aw, bisan unsaon sa simbahan pagdiskarte wala gyud kini mahimo gumikan kay napasar na ang maong balaudnon. Kinahanglan isipon na lamang sa mga obispo nga ang katapusang desisyon anaa sa matag pamilya ug wala sa ilang dinektadoryang baroganan.