EDITORYAL - Prisyo sa mga tambal sa CCMC mahal?

Mahal diay kuno kaayo ang prisyo  sa  mga tambal nga gibaligya sa Botica sa Cebu City Medical Center (CCMC) itandi sa mga medisina nga gibaligya sa  parmasia sa gawas.

Gituyo sa  tagdumala  sa CCMC  ang  pagpaburot  pag-ayo  sa prisyo  sa  ilang  mga  tambal aron makakuwarta  ang  maong  tambalanan  nga  gipadagan  sa kagamhanan  ning dakbayan. Usa sa  hinungdan mao ang  kakuripot sa mayoriad sa mga konsehal nga maoy magbubuot sa  budget  nga  angay  igahin  sa  pagpadagan sa maong tambalanan matag tuig.

Usahay kun imong analisahon way laing gisurambaw  sa mga konsehal nga nagbuot  sa budget sa CCMC  ug  sa tagdumala sa maong hospital gawas  sa publiko.

Ang tagdumala sa CCMC way laing mahimo aron  modagan ang maong tambalanan gawas  sa pagpamahal  sa prisyo  sa iyang  mga  baligya  aron  nga ang  ginansya  maoy  isustento  sa mga panginahanglan  sa tambalanan.

Imbis ang mga konsehal  maoy  ilang pahimungtan, ang  mga kabus  nga  mga  pasyente  maoy  ilang gibunalan  ug susama ra  nga indirekta  nilang  paagi  sa pagpahadlok ug  pagpaidlas sa  mga kabus  gikan  sa pagpa-admit ug pagpatambal   sa maong  tambalanan gumikan  sa ka-mahal sa prisyo  sa  mga tambal  niini.

Apan  ang  mga kabus, mapugos  sa pagpa-admit  sa maong  tambalanan  tungod kay anaa  sa ilang  hunahuna  nga bahala  na  kun mahal  ang  mga  tambal  niini  basta barato  lang  ang  bayranan  sa kuwarto  ug  sa  mga  doktor.

Sa laktud, karong giprangka  na  sa tagdumala  sa maong tambalanan  nga  tinuyo  nila  ang  pagpamahal  sa prisyo  sa ilang mga tambal, aw awhagon ang  mga pasyente nga  likayan ang  pagpamalit  og tambal nga  gibaligya  sa Botica nga anaa  sa sulod sa maong hospital.

 Apan gumikan kay ang  mga  kabus  nga pasyente wa may kuwarta  nga  ikapalit  og tambal  sa  gawas, simpre mapugos  gyud  sa pagpangutang og  medisina  sa maong Botica  ug mag-antos  sa kamahal  sa prisyo  sa  mga tambal niini.

Dinhi angay  ibubo sa  mga kongresista ang ilang pork barrel sa way pagpinig, suporter man nila o dili pinaagi  sa paghatag og Philhealth Card sa matag pamilyang kabus.

 Aron  nga sa pagpa-admit nila sa CCMC may Philhealth nga  mosapupo  sa ilang bayranan ug makadagan ang  maong tambalanan bisan  pa kun surambawon ang  budget niini sa mga  konsehal ug sa tagdumala sa maong hospital.