Daghang litson

Kun bug-at man g’yud gani ang ebidensya batok ni Gobernador Gwendolyn Garcia nga sad-an siya sa kaso nga gipasaka ni kanhi vice gov. Gregorio Sanchez, kanus-a man diay siya angay’ng suspensohon? Unya ra ba kun dili na siya gobernador?

Alang nako angay lang nga si Gwen suspensohon na gayud karong higayona, kana kun bug-at man g’yud ang ebidensya nga siya nakahimo og salaud nga maisip nga grave abuse of authority. Apan walay nagpugong kaniya sa paghimo og mga legal remedy kon pamaagi nga dili mahinayon ang pagpahamtang og suspenso kaniya sa unom ka buwan.

Daghan ang wala kaayo makasabut kun unsa kini nga kaso nga nakapasuspenso ni Gwen. Nagtoo man gani ang uban nga kabahin kini sa kontrobersyal kaayo nga pagpalit sa Kapitolyo og yuta nga anaa sa dagat, ang naila kaayo nga “Balili Property” sa Naga.

Dili kana mao. Kining kasoha nga nakapasuspenso ni Gwen naglambigit sa pag-insistir niya nga siya ang adunay katungod nga motudlo og mga kawani nga sakop sa Sanguniang Panlalawigan.

Gibaliwala ni Gwen ang baruganan kaniadto ni vice governor Sanchez nga ang bise gobernador maoy adunay katungod nga motudlo og kawani basi sa hukom sa Supreme Court.

Susama niining maong kaso nahitabo usab sa gobernador ug bise gobernador sa Occidental Mindoro ug miabot gani gayud sa Supreme Court. Ang labaw’ng hukmanan mitataw nga ang bise gobernador maoy “appointing authority” sa mga kawani sa Sanguniang Panlalawigan.

Na hala, atubanga na Gwen ang imong kaso. Kun makakuha og Temporary Restraining Order (TRO) si Gwen gikan sa Court of Appeals aron pugngan ang pagsuspenso kaniya, maayo.

* * *

Kun ang dakbayan sa Sugbo wala lang mamalit og “overpriced” nga lechon, maisip nato nga miabut og subra sa 105,000 ka litson ang gipalit ni Mayor Michael Rama gikan kaniadtong Enero hangtud sa Nobiyembre 30.

Basi sa report nga miabut sa opisina ni Konsehal Margot Osmeña, ang chairperson sa Committee on Budget and Finance sa City Council, nga si Mayor Rama nakagasto og P422,600 alang ra sa lechon. Ang P4,000 nga lechon daku na man kaayo. Nagtoo ang uban nga kun ang mayor mohatag og lechon sa mga barangay nga mag-party o sa iyang mga higala gikan kini sa iyang bulsa ang gipalit.

Ang gikabalak-an lang nako kun ang kantidad sa lechon gipaburot pag-ayo aron nga dunay mga mapahimuslanong opisyal sa City Hall nga makadawat og komisyon gikan sa lechon dealer.

Apan mora’g gi-overprice man tingali ang kantidad sa lechon. Duha ka lechon nagkantidad og P10,500. Gihatag kini sa mayor alang sa Bulacao Women’s Organization ug sa Gabutan Clan sa Guadalupe.

Ngano kaha nga gihatagan man ang Gabutan Clan? Pwede tingali nga ang mayor mohatag og lechon sa usa ka “private individual” apan dili niya i-charge sa kwarta sa kagamhanan.