Kinsa bay angay tagaan sa Pasko?

Hapit na sab ang Pasko -- ang adlaw sa paghinatagay. Apan si kinsa ba ang angay hatagan? Ang aduna na bay daghan, o ang wala pa?

Dinhay mga pobreng bata nga nanaygon sa usa ka harianong panimalay. Imbes hatagan og sensilyo, gipagukod pa hinuon sa mga mangtas nga iro. Pero dihang maoy mipuli ang mga anak og dato, wala lang sudlig mga papel de banko ang sobre nga gihatag; kun dili, gidalitan pag lami nga mga pagkaon ang grupo. Diay, mga anak kini og mga opisyales sa gobiyerno, kinsa ila ra sab nga kumpadre ug kumadre.

Sa mga balay ubos sa Christmas tree, giandam sa tagbalay ang nagkalainlaing gifts. May putos nga gamay. Duna poy dako. Nagkalainlain lang ang gidak-on-naglarawan nga dili pareha ang balor niini. Ang mahalon gitagana alang sa kinugos nga anak og dato. Ang baratohon para sa anak sa ilang helper.

Ingon ini ang mentalidad natong mga tawo. Kun dato gani ang atong tagaan, paninguhaon gyod nga mahalon sab ang gasa nga ikatunol. Pero kun kabos gani, mantineran lag barot! Ang rason simple ra: ang dato suheto sa mga presyo sa mga butang nga mahalon ug baratohon. Samtang ang mga kabos, wala! Nahadlok ang mohatag nga sawyon sa dato ang ilang ihatag. Busa, kinahanglang bongga. Way kaso sa pobre kay dunolan lag ukay-ukay, malipay na! Ang pangutana: Unsa man gyod diay ang tinuoray nga balor sa paghatag og Christmas gifts? Ang balor sa gasa, o ang balor sa kasingkasing sa naghatag? Unsa ba ang mas importante? Ang material happiness nga bation sa tawo? o, ang spiritual happines? Ang mga adunahan buhong na sa mga mahalong materiyal nga butang. Bisa’g unsa pang klaseha sa mahalong gasa ang imong ihatag, baliwala na lamang nila kini. Sanglit pirme na nila kini matilawan ug anaa sila’y daghan niini. Mo-appreciate man tuod sila, pero menus. Sa laktod, natagbaw na sila sa matang sa kalipay nga mawagtang lang dayon sa hamubong panahon (material happiness)  -- sa matang sa kalipay nga maoy imong gidalit kanila. Unya, imo pa kining pun-an?

Apan kun ang mga pobre maoy imong hataga’g Christmas gifts nga mahalon -- sa mga butang ning kinabuhi nga tagsa ug wa pa gyod nila matilawi, segurado gayod nga maangkon nila ang bug-os nga kalipay, diin samtang sila buhi pa ning kalibotan, ikaw dili gyod nila hikalimtan.

Ang nakaparat god nato, tawo kun kita mohatag ... naghunahuna ta’g bawos. Usa kini ka dakong sayop nga praktis. If we give, we do without conditon. Never expect something in return. Ang importante nga sa paghatag maangkon nato ang spiritual happiness, diin masinati lang nato kini kun ang hatagan nato’g mga gasa, mao kadtong mga kabos, makililimos, ulipon ug kadtong mga binuhat nga dili ug dili makabawos nato -- mga binuhat nga uhaw ug gutom sa mga inadlaw’ng panginahanglan. Ang Pasko haduol na -- ang adlaw nga tinghatag og Christmas gifts. At least, aduna na tay ideya kinsa ang angay natong hatagan? (Javier Y. Tapulado, Banawa, Cebu City)