Kapakyasan? Imo kanang gipili

May duha ka managsoon si Ruben ug Ronald. Gikan sila sa usa ka pamilya nga kabos ug gani sa dihang elementary pa sila kanunay silang moeskwela nga haw-ang ang tiyan apan bisan pa niini kanunay silang mo hawod sa klase. Dihang na high school na sila nakat-on na sila og pangawat aron masodlan ang ilang tiyan ug nakighugoy na sa barkada. Ang kanhi mga grado nga maayo nitiurok na ug gani nahagbong na ang uban.

Usa ka higayon nasigpatan ni Ruben ang mga manghod ug inahan nga nagkagidlay ug ang amahan, nga natiguwang na kaayo tan-awon tungod sa bug-at nga trabaho iyang napalandongan nga mao pud unya iyang dangatan. Nibalik siya og eskwela’g tarong gani nahimo siyang valedictorian ug nahimong eskolar ug nahimong consultant sa usa ka kompanya ug si Ronald nga wala mag- usab nisangko gayod sa sayo nga kamatayon.

Matod pa sa panultion “Life is what you make it.” Ang tawo gihatagan sa Ginoo og kagawasan kung unsa ang gusto niya nga mahitabo sa ilang kinabuhi. Igo ra siya nga moagak ug mohatag sa panalangin. Kung unsa man kita karon kana nagsukad sa atong pagpili sa dalan nga atong lakwan.

“Ang tanan anaa ra kanimo. Lihok tawo kay tabangan ko ikaw.”