Bati g’yud kaayo

Duha ka bus nga alang sa barangay dinhi sa dakbayan anaa giparada atubangan sa Cebu City Hall sukad pa kaniadtong Biyernes. Ang maong bus, kun wala ko masayop, nagkantidad og dul-an sa usa ka milyon ka pesos.

Akong gisusi kagahapon ang maong bus. Una, gilibot nako ug gipangpik-pik ang bungbong niini. Kargado kaayo og masilya. Ikaduha, naobserbahan nako nga apiki kaayo ang pagkabutang sa lingkoranan.

Giduol ko sa usa ka gwardya ug giingnan nga mahimo ra nga mosulod ko aron masuwayan nako’g lingkud ang lingkoranan. Wala g’yud ko masayop kay pwerteng apikiha nga pagkabutang sa lingkoranan.

Gawas nga barug ra kaayo ang sandiganan sa bus, dug-ol ra kaayo ang masig ka lingkoranan nga dili makalihok-lihok ang tuhod sa maglingkod. Paita, mora man og gibartolina ang mosakay aning maong bus.

Tungod kay duol ra man kaayo ang masi’g ka lingkoranan, kun ang drayber mokalit pagtamak sa “brake,” sigurado nga ang pasahero mamusmos ang baba sa puthaw sa sandiganan nga anaa sa iyang atubangan.

Angay unta kadto nga butangan og “foam” kay aron dili makahatag og kakuyaw sa mga mosakay. Klaro usab kaayo nga pinadagan ang pagkahimo sa maong mga bus.

Gitandi nako ang maong bus nga gipalit sa dakbayan sa mga bus nga gipanag-iya sa mga pribadong sektor, lahi ra kaayo. Ang mga tiil-tiil sa lingkoranan gidiritso ra pagwelding sa sawog.

Sigurado ko nga dali ra kaayo maukal ang maong tiil-tiil nga giwelding ra sa sawog, bati pa gani pagkawelding. Lahi sa ubang bus nga ang mga tiil-tiil sa lingkoranan giroska g’yud sa sawog.

Ang sawog gani sa maong mga bus, gidali-dali ra’g pintal og itum. Aw, mas maayo tingali nga kamong mga opisyal sa City Hall susihon ninyo ang maong mga bus kun dili ba kamo maanugnan sa dul-an sa usa ka milyon nga gasto pagpalit.

* * *

Atol sa Christmas Party nga gihatag ni Mayor Michael Rama ngadto sa mga news reporters nga nadistino sa City Hall niadtong Biyernes sa gabii, mihimo ko og pasundayag.

Kuan ra gud, ginagmay nga tricks nga gitawag sa mga bata og “magic.” Sa laktud, lipat-lipat sa mata.

Pipila ra ka tricks ang akong gipasundayag kay mora man og wala makaandam ang uban nako nga mga kaubang reporters. Iya-iya man gud unta mi nga mopakita sa among mga talent.

Lingaw lang gihapon mi. Miuban namo si Mayor Rama sa pagkantahay. Grabeng mga imbitasyon sa party uy, halos kada adlaw. Pero ang tambag nako sa akong mga higala, kalma lang sa pagkaon og mga lechon.