Nganong napilde?

Dunay gi-estorya ang inilang sportswriter nga si Joaquin “Quinito” Henson bahin ni Manny Pacquiao ug sa iyang pagka-relihiyoso. Kining estoryaha may labot usab sa miaging boksing ni Manny didto sa Las Vegas.

* * *

Suma pa sa giasoy ni Quinito, sa adlaw sa iyang (Manny) iskedyul sa away batok ni Juan Manuel Marquez, si Pacquiao nitambong sa Bible service ni Pastor Rice Books sa Every Nation Church (dili Katoliko nga simbahan) didto sa 60th floor sa Mandalay Bay Hotel.

* * *

Kini bisan pa nga nagsabot na sila ni Fr. Marlon Beof (Katoliko nga pari) nga blesingan (blessing-ngan) siya (Pacman) niining maong pari atol sa Catholic Holy Mass kay kapistahan man kadto sa Immaculate Concepcion, usa ka dako ug importante nga fiesta alang sa mga Katoliko.

* * *

Gipahibawo ni Fr. Beof sa wa pa ang Misa nga si Pacquiao modawat sa iyang blessing human sa Holy Communion anang adlawa. Suma pang Fr. Beof giiskedyul gayud niya ang blessing alas 8 a.m. aron makatambong gyud si Manny bisan duna pa siya’y tambongan nga Bible service (non-Catholic) sa alas 8:30 a.m. Apan: “Pacquiao never showed up” matud pa ni Quinito Henson.

* * *

Gipadayon ni Fr. Beof ang Misa nga wala tambongi ni Manny. Si election lawyer Romy Macalintal ang nagbasa sa first reading ug si Bacolod City Mayor Bing Leonardia sa second reading. Si kanhi world boxing champion Gerry Peñalosa, kinsa nitambong sa maong Misa, naka-ingon: “Kaanugon nga wa hatagi’g bili ni Pacquiao ang Misa atol sa pista sa Immaculada Conception.”

* * *

Suma pang Gerry Peñalosa, subo hunahunaon nga napilde -- ug dakong pagkapildiha -- si Manny Pacquiao sa adlaw nga gisaulog ang kapistahan ni Mama Mary.

* * *

TRIVIA. Ang atong  gi-estorya karon gikan sa artikulo ni Quinito Henson nga nigawas sa Philippine STAR adtong Disyembre 10, 2012.  Daghang salamat Quinito.