Opisyales sa customs nakig- kombuya sa mga smuggler?

(Ikaduha sa duha ka hugna )

Sa inyo nang nasayran kusganon nga gisupak ni Customs Police Division Chief Camilo Cascolan ang pagguyod sa tulo ka mga 20 footer nga container vans nga may sulod nga mga pinalusot nga asukar nga gikan sa Thailand nga nakatago na sa usa ka bodega nga gipanag-iya sa Greenhills Product Inc. nga nahimutang sa may dalan Asahi sa Barangay Kasuntingan sa dakbayan sa Mandaue pabalik sa Cebu International Port o CIP. Ang maong pagsupak ni Customs Police Chief Camilo Cascolan gipaburan ni Customs District Collector sa Port of Cebu Ronnie Silvestre bisan pa man sa tambag sa legal department sa Bureau of Customs. Ang hugot nga pagsupak ni Cascolan walay gibasihan  nga balaod.

Napulo’g usa ka adlaw human madiskobrehi ang pinalusot nga asukar nga gikan sa Thailand ug human usab supaka ni Cascolan ang pagdala o pagguyod og balik sa nahisgutang mga container vans sa Cebu International Port o CIP aron dili kini makawatan o mailisan, naguyod ra gayod ug naabot sa Cebu International Port ang container vans. Apan sa tulo ka mga container vans nga dalhon unta sa CIP duha ra niini ang naabot tungod kay ang usa nawagtang na. Ang duha nga nawagtang dili na usab kini ang orihinal nga vans nga gisudlan sa mga pinalusot nga asukar.

Ubos sa Tariff and Customs Code ug ubang mga direktiba nga gipagawas na sa Bureau of Customs, ang Customs police gimandoan sa pagbantay 24/7 o pagbantay pagmaayo sa mga masakmit nga mga pinalusot nga mga kargamento. Apan sa gipakita sa hepe sa Customs police daw sa wala siya magpakabana sa pagbantay hinungdan nga nawagtang ang usa ka container vans nga may sulod nga pinalusot nga asukar ug ang laing duha ka container vans nailisan na.

Nganong passive man o nganong nagpaka way paki man si Customs police Chief Camilo Cascolan sa kargamento nga dapat niyang bantayan? Dili kaha siya ang kontak sa insik nga smuggler? Nangutana lang. Gibayaran kaha siya og dakong salapi? Kun nabayran man, pila? Tulo ka milyon? Sa tulo ka milyon, nakuha na ba niya ang tunga sa milyon? Nangutana lang gihapon. Dili man seguro dautan kun mangutana ta.

Kun walay basihanan sa balaud ang pagsupak ni Cascolan sa pagguyod pagbalik sa mga container vans ngadto sa CIP gikan sa bodega sa Casuntingan, Mandaue nganong gipaboran man siya ni Cebu Customs District Collector Ronnie Silvestre? Tungod ba kay friendship sila?