Libud-suroy

Angay’ng mag-inabtik na karon sila si Betty Ganub, ang sinaligan ni Mayor Michael Rama sa paghipos sa mga bata nga libud-suroy nga anaa nanaygon sa mga motorista ug pasahero sa mga PUJ.

Grabe… midaghan na kining maong mga bata diha sa atong karsada. Basin moingon na ‘sab mo Beth nga wala mo’y sakop nga makaaksyon. Si Betty man gud ang gisaligan ni Mayor Rama niining maong gimbuhaton.

Kun wala gani mo’y himoon niini Beth, makaingon ko nga dili kamo angayan nga modawat og additional bonus nga ipahatag ni Mayor Rama sa mga regular ug kaswal nga kawani sa Cebu City Hall.

Pag-agi nako sa eskena Escario ug Gorordo kagahapon, pwerteng daghana nga mga bata, walay labut niadtong usa ka tawo nga daku na, nga mitunol sa nagkang-kang nila nga kamot sa mga motorista ug sa mga pasahero sa PUJ.

Ang tumong nila mangayo og kwarta. Kuyawan ko nga kining maong mga bataa nga maglabang-labang sa karsada nga naninguha nga daghan sila og mapangayoan, mabag-iran unya sa mga sakyanan. Sigurado nga magkaproblema g’yud ang mga drayber.

Paminaw naku, igo lang manghunaw ang opisina ni Betty Ganub. Sigurado ko nga ang ila na usab nga han-okan niini mao ang mga opisyal sa barangay. Kun dili molihok ang mga opisyal sa barangay, lihok mo nga dili magsalig nila!

* * *

Ang Gorordo Avenue gideklarar nga “no parking” sa mga sakyanan apan ngano nga wala man makabadlong ang mga traffic personnel sa CITOM sa daghang armored vehicles sa Banco de Oro nga kanunay’ng giparking atubangan sa ilang bangko diha sa Gorordo?

Pag-agi nako kagahapon diha sa Gorordo Avenue atubangan sa maong banko, lima ka armored vehicles ang giparking daplin sa karsada. Dili kay kagahapon lang kini nga anaa diha. Kanunay kini nga gihimong parking area sa mga armored vehicles ang daplin sa karsada. Dili ba law-ay kaayo tan-awon nga adunay karatola nga “no parking” apan wala ninyo badlonga?

Sama ra kini niadtong lapad kaayo nga karatola nga gibutang taliwala sa karsada sa gitukod nga construction duol sa University of Cebu nga gipasagdan ra usab sa CITOM.

Wala na ko makaantos mao nga gibadlong nako ang gwardya ug kadtong trabahador sa construction. Karon, wala na nila ibutang ang lapad kaayong placard taliwala sa karsada. Palihug, badlonga ninyo ang maong mga drayber sa armored vehicles sa banco nga dili diha sila magparking samtang magpaabot nga duna silay delivery o kaha kwarta nga pik-apon.

Pasalamat ko ni higala Joy Tumulak, ang assistant ni CITOM executive officer Raffy Yap nga moaksyon dayon sa mga reklamo.