EDITORYAL - RH Bill mag-agad sa konsensya sa mga magbabalaod

Takdo  ug  di  malalis  ug di matuis  ang  gisulti  ni Presidente Aquino bahin sa  mga magbabalaod kansang  konsensya  maoy angay  nga mahimong barahan  sa ilang  pagpakanaog  og  desisyon, angay  bang  botohan o di  sa pagkabalaod   ang  RH Bill.

Kay  sa pagkatinuod  ang  usa  ka maayong  lider nga  naglantaw sa ikaayo  sa  iyang  mga  sakop  mogamit  gyud  og  konsensya  nga way reserbasyon ug  paharion  ang  kakursonada  nga  way bulok pamolitika.

Si PNoy isip  presidente  sa nasud  maoy silbing amahan  sa 95 milyones  ka mga Filipino  kansang  baruganan wa mabalaka  sa  mga  hulga nga kutob  sa mobotar  sa RH Bill aron mahimong balaod  silotan sa Catholic vote.

Nalantawan  sa presidente  nga  ang nasud  sa China  nga  gi-huwes de kutsilyo  pagpatuman    ang balaod  nga “one  child policy” wa mahadlok  sa hulga  nga  masuko  ang Dios.

Kay  kun  nasuko  pa ang Dios  sa maong nasud, kay nagkontrolar  sa  ilang  pagpanganak  ang  mga magtiayon, aw hagbay rang nagkamuritsing  ang ekonomiya  niini.

Tingale  nalantawan  ni PNoy  nga  kun  wa  makaako  ang  mga Dios  sa China sa paglatigo  sa  mga Insek  nga  maoy  unang  nagpatuman  sa higpit  nga balaod  bahin  sa pag-kontrolar  sa  pagpanganak,  nga pila  ray ilang Dios,  ang  mga Filipino pa kaha  nga kadaghang  Dios   niini .

Naay Dios  sa  mga  batan-on, sa  mga daga  ug ulitawo ug sa  mga  tiguwang nga pulos  maloluy-on  kaayo.

Dinhi  sa Cebu  anaa  si Sto. Niño, San Pedro Calungsod  ang  presko pa kaayong santos, San Roque nga may iro, San Vicente Ferrer, San Pedro karaang santos nga may manok, San Nicolas, San Antonio, Santa Maria, La Purisima Concepcion ug daghan pa kaayo  nga  bisan mayoridad  kanila di santos nga Filipino kay duha pa may Filipino  nga nahimong santos  sukad  pa  sa panahon  ni Magellan, kini  sila di baya  usab  tingale  magdungan  og  kasuko  batok  sa magtiayong  magkontrol  sa panganak ug nagtuo  ta  nga  naa  gyuy  bisan pila  lang kabuok kanila ang  pabor  sa pagpugong  sa pagpanganak  ilabi  na  ang Dios  nga  susama  og  kinaiya  sa mga Dios  sa China.

Apan  unsa  may katarungan  sa  mga  Dios  sa Pilipinas  nga masuko  kun magpugong  sa pagpanganak  ang  mga  Filipino.

Mao  nga  kargo de konsensya  sa mga  senador  ug  mga  kongresista  ang  pag-uyon o di sa RH Bill.