Trisikad
Labing minus 16 ka mga barangay dinhi sa dakbayan sa Sugbo ang gipaabot nga makadawat og bag-ong mga sakyanan gikan sa City Hall pagpanghakot sa ilang mga basura.
Ang uban sa maong mga barangay anaa mahimutang sa kabukiran. Akong gipahimug-atan ang kabukiran tungod kay motuo mo og dili, mga trisikad ang maong mga sakyanan nga ilang ipanghatag sa dili madugay.
Ang konseho mitugot na sa resolusyon nga gipangamahanan ni konsehal Nida Cabrera alang sa pagpamalit og trisikad aron iapud-apod sa kabarangayan.
Si Mayor Mike Rama mitugot na sab sa maong plano. Una nagplano ang dakbayan pagpamalit og mga tricycle aron gamiton sa kabomberohan pagresponde og sunog sa mga hagip-ot nga dapit. Karon trisikad na sab aron gamiton pagpanghakot sa basura.
Dili kaha maayo magpa-drugtest ang atong mga opisyal sa dakbayan?
Sa akong tan-aw mura man og mga adik ni'ng atong mga opisyal nga nag hallucinate.
Tiaw mo bay trisikad maoy gamiton paghakot sa basura. Kamo kunoy sikad niini didto sa kabukiran lalim ba.
Wala uroy mo maikog sa mga magbubuhis nga inyong mantinilan og trisikad ang pagpanghakot sa basura samtang kamo nagpahimulos sa kaban sa gobiyerno.
Ang pagpanghakot sa basura usa ka batakang serbisyo nga angayang hatagan og prioridad sa atong mga opisyal, apan unsay ilang giuna?
Pagpamalit og luho nga mga sakyanan alang sa mga kapitan ug uban pang lider ni Rama sa kabarangayan apan ang pagpanghakot sa basura trisikad ray ilang mapalit.
Pagkabaga gyud og mga nawong puyra gaba niining atong mga opisyal.
Hinaut makatulog mo og tarong sa kagabhion niining inyong gihimo.
* * *
Nakurat ko sa usa ka basahon nga matud pa giapud-apod didto sa City Hall tungod sa ka malisyoso ug ka libelous niini. Giulohan ni og "Nganong mobalik si Tommy".
Ang maong basahon nga daw sama sa komiks labihan ka bastos ug namasangil sa magtiayong Osmeña sa pagpangakaw.
Ang mga propaganda nga ingon niini dili husto ug mabuhat lang sa usa ka disperado nga kandidato.
Inay nga mogasto pagbaligya sa iyang kaugalingon mihimo na hinuon pagpanaot sa laing kandidato.
Buhaton lang ni sa usa ka tawo nga way ikapanghambog nga nahimo sa iyang kaugalingon.
Ang pagtumaw sa maong black propaganda, pag-angkon na ba sa kampo ni Rama sa ilang kaparutan?
* * *
- Latest
