EDITORYAL - Mahutdan og isla ang Pilipinas sa WPS

Sa usa ka taktika nga dili ikalimod makapailad sa wala kaayo masayod sa isyu ang gipagawas nga bag-ong e-passport sa China nga dunay gipatik nga mapa sa ilang nasud nga naglakip sa West Philippine Sea.  Ang dapit nga gikabikilan sa Pilipinas, Vietnam, Malaysia, China ug niapil sad ang Taiwan.

Kini usa ka taktika. Unsa kahay buhaton sa mga sakop sa Immigration Officers sa airport kung pagtan-aw niini sa passport sa turistang Chinese giapil man sa ilang mapa ang atong teritoryo?

Paregla gyud ni kay nasayod naman ang China nga sensitibo kini kaayo karon nga isyu apan wala sila mahadlok sa epekto niini sa mga nasud nga nangangkon usab sa West Philippine Sea sama sa Pilipinas ug Vietnam.

Sama sa gipaabot kutob lang pamaba ug diplomatikong protesta ang mahimo sa Pilipinas, kanunay nga ang atong mga opisyales sa gobiyerno igo na lang mo-react sa matag aksyon nga himoon sa China.  Ang reaksyon bunga lang sa pisikal nga gihimo sa China ug gipaabot nang  dili kini paminawon.

Kini pagpakita lang nga kaya sa China nga yatakan ang Pilipinas. Kaya niyang bastuson ang atong presidente, ang mga opisyales niini, ang gobiyerno niini ug ang kinatibuk-ang nasyon sa mga Filipino.

Ang nasud sa India nga duna gihapoy giilogang teritoryo sa China diha sa Himalayas regions sa report sa The Philippine Star gikan sa usa ka news provider, mipahibalong dili na sila motingog pa kabahin sa bag-ong biometric passport sa China, ang ilang himuong pisikal gyud nga aksyon alkontra niini.

Ang usa ka opisyal sa India miingon “It feels ,it will be better to speak through actions..than words” matud pa sa opisyal. Ang ilang aksyon? Mobuhat sila og stamps nga itatak sa mga pasaporte nga pormang mapa sa India. Dili sila magduhaduhang ipatik kini sa bag-ong e-passport sa China.

Mao nay aksyon nga walay daghang estoryahay. Wala kini mangita og bikil apan klaro kaayo ang mensahe sa India ngadto sa China. Nganong di man ni buhaton sa Pilipinas? Total apil man ta sa direktang naapektahan?

Ang Scarborough Shoal o Bajo de Masinloc duol kaayo sa Zambales, nganong di man nato butangan og estraktura ug butangan og sundalo? Hadlok ba ang Pilipinas nga laruton na sa China kun ilang makit-an? 

Fight fire with fire. Mao man nay gihimo sa China sa ubang mga isla sa West Philippine Sea ilabi na sa Spratlys. Klaro nang atoa, ilaha gihapong giangkon ug gibutangan og estraktura, karon sakop na daw sa ilang bag-ong gitukod nga siyudad tunga-tunga sa kadagatan.

Kung magsige na lang og tabi ang atong gobiyerno mahutdan kini og isla sa West Philippine Sea nga kabutangan sa atong Bandila.