Dakong kasaulogan

Sa makausa pa, magsaulog karong adlawa ang tanang miyembro sa Alpha Theta Omega sa anibersaryo sa pagkatukod niini. Dinhi sa Sugbo adto sa usa ka beach sa dakbayan sa Lapu-Lapu ipahigayon ang kasaulogan sa mga Althonians, ang tawag kanamong mga sakop sa maong fraternity ug sorority.

Giawhag kadtong mga among kaigsuonan nga mga Althonians dinhi sa Sugbo, Bohol, Negros, Leyte sa pagtambong sa maong kalihokan karon. Daghang surprisa ang mapaabot sa kasaulogan karon. Hinuon sa Nobiyembre 27 pa ang adlaw sa katukoran sa Alpha Theta Omega. Apan dinhi sa Cebu, nasabotan nga karong adlawa na lamang ipahigayon ang kasaulogan niini gumikan sa ka apiki sa schedule.

Isip usa sa mga adviser sa maong kapunungan dinhi sa Cebu Unified Chapter, ako naglaum sa kooperasyon sa tanan. Hinuon, sama sa naandan, daghan ang mohugop karon didto sa maong venue. Kini ilabina nga daghan usab ang mi-commit nga motambong sa tinuig nga kalihokan.   

 Kadali ra gayud sa panahon. Sa paghimugso sa Alpha Theta Omega daghang dekada na ang nakalabay, wala damha nga misugwak na kini og liboan ka mga bunga. Sa upat ka korner sa kalibotan adunay mga Althonians nga nagpahipi ug andam pagsabwag sa mga maayong doktrina ug tinuhoan sa maong organisasyon.

 Tungod sa maayong pagpadagan niini diin ang mga Althonians nagtiner gayud sa maayong pagtulon-an nga nalatid sa bylaws ug konstitusyon niini, usa karon sa labing respitadong fraternity ang Alpha Theta Omega sa tibuok kalibotan.

 Gani daghan sa mga Althonians ang nagkupot karon og tag-as nga mga katungdanan sa kagamhan ug sa pribadong sektor. Ug kini nagpamatuod lamang nga kining maong organisasyon adunay gihuptan nga importanteng papel alang sa ekonomikanhong kalamboan sa nasud.

 Ug niining pagsugwak sa modernong teknolohiya, mas mapalambo pa sa mga Althonians ang pagserbisyo sa publiko. Gani, dinhi lamang sa Sugbo, adunay mga community service programs nga nakalinya isip kabahin sa kawsa alang sa maayong ugma.

 Sa tanang mga sakop sa Alpha Theta Omega sa tibuok kalibotan, maayong pagsaulog sa atong anibersaryo!