Ikaduhang hilisgutan

TUMONG: Imantala ang mga mahinungdanong kamatuoran sa kinabuhing Pastoral  ni Obispo Teofilo Bastida Camomot

C. Kay unsa ba diay ang pag-ampo?: Teolohikanhong pamalandong

Matud pa sa CFC19 NO. 1476: “Ang pag-ampo nakaumol og usa ka maalinggatong kalambigitan tali sa Dios ug sa tawo. Diin kini mag-agad kun kinsa ang Dios ug kinsa kita.” Nga sa ato pa, ang pag-ampo usa ka gamhanang kahimanan aron mas masuod ang tawo ngadto sa Dios, diin ang tawo nakighinabi sa Dios sa paagi nga personal o dili ba kaha katilingbanon.

1. Mga matang sa Pag-ampo

a. Pag-ampo sa pangayo -- Diin ang tawo mipadayag ug miangkon sa iyang kakulangan busa mapaubsanon siyang mohangyo ngadto sa Dios sa iyang dakong panginahanglan.

b. Pag-ampo sa pasalamat -- Pagpasalamat sa mga grasya nga nadawat gumikan sa Diosnong Pag-amoma.

c. Pag-ampo sa pagdayeg -- Diin ang tawo nipadayag sa iyang nanghingapin nga pagtahud sa Diosnong Gahum.

d. Pag-ampo sa paghinul-sol -- Diin ang tawo mapaubsanong miangkon sa iyang sayop nga nahimo ug sa mga higayon nga iyang giabusohan ang kaayo sa Dios.

e. Pag-ampo sa paghalad -- Diin ang tawo ang miuli ngadto sa Dios sa bisan unsa nga iyang nadawat gikan Kaniya. Apil na niini ang paghalad sa kaugalingong kinabuhi ug mga paningkamot.

2. Mga Kinaiya nga Angayang Huptan diha sa Pag-ampo

a. Paghupot og Kinaiya sama sa usa ka bata uban ang pagpaubos. Matang sa kinaiya nga makapaaghat kanato sa pagtawag sa Dios nga atong Amahan.20 Dugang pa, pinaagi lamang ning maong kinaiya nga ang usa ka tawo nga nagpakabata diha sa pag-ampo ang mamahimong yano ug matinud-anon sa iyang tuyo. Si San Hannibal Maria di Francia ang nagkanayon: “diha lamang sa pagbansay sa kayano nga ang usa ka tawo dili mahimong magpakaaron-ingnon atubangan sa Dios ug sa iyang Isigkatawo.”21 Sumpayan