EDITORYAL - Disyembre 21 matapos kuno ang kalibotan?

Usa ka tinamhangan nga balita  ug pagtuo sa mga Mayan nga nagpasabot lang  sa  klase  sa  mga  tawo nga  wa masayud  sa mga  pulong sa Dios  nga anaa  sa Biblia.

Ang maong  klase  sa  mga tawo  nga nagpasigwar  niining  balitaa  susama  ra  sa mga tawong  di usab motuo  nga  matapos  ang  kalibotan  nga nagpasabot  nga  wa gyud magpakabana  unsay  mahitabo  sa tawo  ug  unsay  mahitabo  niining  kalibotana.

Mga tawo nga  way  pagpakabana  kun may  Dios  ba siyang angay simbahon ug alagaron ug  nga susama  sa hayop  nga way kasayoran bahin  sa umaabot  nga  ugma sa  iyang  kinabuhi.

Ang hayop  wa sanguni  sa Dios  og katungdanan  nga moila ug moalagad  Kaniya, lahi  sa tawo  nga  Iyang  gihatagan  og  kasugoan  o balaod  sukad pa sa panahon  ni Adan ug Eva ug hangtud  niining  mga panahona  nga mabasa  sa Biblia.

Nagkagubot  karon  ang  kagamhanan  sa  usa  sa  mga  lugar  sa France  tungod sa gisabwag  nga balita  sa mga Mayan  nga  matapos na  kuno  ang  kalibotan  sa Disyembre 21, 2012.

Busa  miaksyon dayon  ang  kapolisan didto  sa  pagdestino og  kagatosan ka  mga polis  sa palibot sa  usa  ka bungtod    nga  gitawag  nga Bugarach   sa di pa ang Disyembre 21 pamasin  nga  maghuot  ang  mga tawo  didto  kay mao kuno  kadtong  bungtora  ang  ilang dangpan aron di  sila  mamatay  sa dakong katalagman inigkatapos  sa kalibotan.

Paita  ug  luoya  sa maong  matang  mga tawo  nga  way laing  gisandigan sa ilang pagtuo  gawas  sa ilang kaugalingong  nakat-onan  bahin  sa kinabuhi  sa tawo  ug  sa kalibotan  nga atong  gipuy-an.

Kay  sa Biblia tin-aw  nga  gisaysay  nga  ang  bugtong  nasayud  sa katapusan  sa kalibotan  mao ra ang Dios.

Apan wa Siya  maghisgut og petsa ug bisan  si Kristo  wa  masayod  niini  gawas  lang  sa mga timaan  nga Iyang  gipaila  sa Biblia  nga  una  matapos  ang  kalibotan, mahitabo  ang  gubat nasud batok nasud, ug mga linog  sa nagkalainlaing  lugar  sa kalibotan .

Sa katapusan  sa kalibotan sumala  sa Biblia, dauban  sa Dios kining kalibotana  sa  kayo  nga  gitawag  nga impiyerno ug  ang  mga  tawong  wa mag-alagad Kaniya itambog didto  nga way kamatayon.