Hagit sa trabaho

Ang kamatayon sa usa ka Marlon Bellita daan nang nadawat sa akong huna-huna dihang nakasud-ong ko sa iyang kahimtang sa tambalanan.  Sa ospital pa lang, naglisud na si Marlon ug mouyon ka sa kamatuoran nga kuhaon na lang siya sa kahitas-an inay mag-antos sa maong balatian.  Apan sa iyang pamilya, daghan ang nag-ampo ug nanghinaot nga mahibalik sa normal ang kondisyon ni Marlon ug mahatagan sa samang kusog ug kadasig nga moalagad sa iyang mga tigpaminaw ug mogitik sa kahapunon sa libuan ka mga tawo nga nahimo niyang suod nga higala sa kahanginan.  Apan ang maong mga pag-ampo--- natubag sa laing paagi.   Ang kamatayon ni Marlon Bellita nakapakugang gihapon sa mga tawo nga naglaom nga maulian siya.

Wa’ nay mas lisud dawaton gawas sa pag-abi-abi sa usa ka kauban su’d sa balay trabahuan nga usa na ka patay. 

Ang pag-abot sa patay’ng lawas ni Marlon sa ABS-CBN  Broadcast Complex niadtong miaging Biyernes, ang maisip nakong labing magul-anon nga senaryo nga nahitabo sa kompaniya nga among gitrabahuan.  Bisan kinsa namo sa ABS-CBN wa’ magdahop nga moabot sa punto nga ang patay’ng lawas sa usa ka kauban dad-on sa among buhatan aron didto saludohan ug hatagan sa mga pasidungog tungod sa iyang mga nahimo.  Labaw sa tanan, di’ sayon dawaton ang usa ka kauban nitaliwan na sa hingpit.

Sa labing unang higayon sa kasaysayan, usa ka haya ang gibutang sa studio sa ABS-CBN--- ang dapit diin mas namong nailhan si Marlon Bellita gikan sa iyang pagpakatawa hangtud sa iyang mainiton nga pag-abi-abi sa mga kapamilya atol sa Kumbira sa Kapamilya ug grand finals sa Barangay Idol diin siya ang tigduma.  Sa maong studio, niukit sa iyang talento ang usa ka Marlon Bellita, layo sa iyang mga tigpaminaw apan duol sa mga kapamilya nga iyang nakauban sa buhat.  Wa’y magtuo nga ang usa ka dapit nga kabahin sa pagpakatawa, paghatag og papremyo ug paghatud sa balita, maputos sa tumang kaguol ug pagbangutan.  Apan tungod ug alang sa usa ka mahinungdanon nga kapamilya, gibuksan ang maong dapit aron sa hingpit nga pagpadayon sa usa ka higala ug kauban.

Di’ maihap ang mga tawo nga nihatud ni Marlon sa iyang pahuwayanan nga dayon. Apan ang maong okasyon, ang nahimong da’n aron nga magkita pag-usab ang mga suod nga higala ug mga kanhi kauban sa kompaniya.  Bisan ang mga kanhi kauban nga sukad masukad sa ilang pagbiya wa’ na namo makit-i, subling nipatin-aw aron sa pagyukbo sa katapusang higayon sa usa ka Marlon Belita.  Bisan ang mga kapamilya nga di’ kaila, nagpugkos sa usa ka tumong---ang pagpadayag og simpatiya sa pagkawa’ sa usa ka personalidad sa media nga wa’ lang motuman sa iyang trabaho--- apan nitandog ‘sab sa balatian sa libuan ka mga tawo pinaagi sa iyang matinud-anong pangalagad.

Samtang nagsud-ong ko sa mga tawo nga nagdasok sa simbahan atol sa requiem mass alang ni Marlon, hangtud na sa pagtumod niya ngadto sa iyang lubnganan, daghang butang ang nagduaw sa akong huna-huna.  Usa ka dakong kamatuoran diay nga adunay dakong gahum sa pagpanibya ug gamhanan ang mga tawo nga nagtrabaho sa maong industriya.  Apan ang usa ka Marlon Bellita, nigawas gikan sa iyang gahum ug nipaambit pa sa iyang pagkatawo ngadto sa mas nanginahanglan ug nahimong taytayan alang niadtong mga buot motabang.  Tinuod, di’ ikalalis ang dakong gahum nga gihuptan tungod  ning maong trabaho nga gihuptan.  Apan gipamatud-an ni Marlon nga adunay tukmang paagi aron mahingpit ang maong gasa sa pagpanibya.

Daghan sa mga kauban ang nakapangutana, hatagan ba ‘sab kaha sila og susamang init nga suporta sa mga tigpaminaw ug mga tigtan-aw kun o galing moabot ang panahon nga sila na ‘sab ang motaliwan?  Wa’ magkuwang og tubag si Marlon sa maong pangutana.  Iyang gipamatud-an nga ang sinsirong pangalagad, nga wa’ magpaabot og bugti, ug ang integridad sa paghupot sa iyang panga’n ug impluwensya ang tinuod nga magbukas kanimo ngadto sa daghang mga tawo aron sundon ang imong programa.  Lahi na tuod ang mamahimong dagan sa kompaniya karon sa pagkawa’ sa usa ka Marlon Bellita, apan iyang mensahe mao ang paghupot sa maong gahum sa labing responsableng paagi.

* * *

Email: [email protected] or [email protected]