Ang drugas ug politika

Kun nakaalinggat mo subsob na usab ang kampanya sa atong kapolisan ug mga otoridad batok sa ginadiling dugas ug illegal nga sugal. Kini gumikan kay nagkaduol na usab ang piniliay. Kun nakamatikod mo, ang kampanya batok sa ginadiling drugas ug illegal nga sugal mokusog gayod matag panahon nga maghawong ang piniliay. Kana gumikan kay ang ginadiling drugas ug illegal nga sugal gigamit sa mga politiko sa ilang pagpapili sa piniliay isip panapi o pasikat.

Panapi gumikan kay ang tumong sa pipila sa atong mga otoridad sa paglutos sa mga nagpayuhot sa ginadiling drugas ug ginadiling sugal dili man ang pagwagtang gayod niini ug pagtaral sa mga nasakpan kun dili mao man lang ang pagpadugo sa mga nalambigit niini aron aduna silay magamit sa piniliay. Busa ang target ning maong mga otoridad kadto lamang dili makahatag sa ilang gusto o ba kaha ang kakompetensiya sa ilang mga padrino nga mga tigpayuhotan og ginadiling drugas ug nagpadagan sa mga ginadiling sugal. Subo nga palandungon nga ang ginadiling drugas ug ang ginadiling sugal gigamit sa pipila ka mga politiko sa ilang interest sa politika ug ang kapolisan miuban usab kanila.

Ang kapolisan sa iyang kampanya batok sa sugal ug ginadiling drugas nagdrama lamang usab. Aron ingnon nga naglihok batok sa nahisgotang suliran, manakop pero niadto lamang mga bukot-bukot nga mga tigpayuhot ug tigpadagan sa sugal. Kay drama, maong ang sanga ra ang ilang giputol sa hinay-hinay ug wala mangambisyon sa pagluka sa punoan. Sa suliran sa sugal igo ra sila sa pagdakop sa mga asher ug coordinator, wala gyod sila makadakop sa financer. Sa suliran sa ginadiling drugas igo ra gyod tawon sila sa pagdakop sa mga street pusher, gani magkalisod pa, wala gyod sila makadakop sa tighimo ug tigsupply sa ginadiling drugas. Hinoon makasabot ta tungod kay kauban ra man ugod  pud nila ang gidudahang drug lord unya pupariha ra usab nila kini og ranggo kun dili man ugaling nila kini labaw.