Obispo Teofilo Bastida Camomot

Bisan pa man kun gikutlo ang iyang kinabuhi sa masakit nga paagi, apan nagpabilin siya ingon nga usa ka buhing timaan dinhi sa yuta sa pagkasumosunod ni Kristo. Nahuptan niya ang mosunod nga mga hiyas: Maampuon, mahigugmaon, manggihatagon, mapaubsanon.

PAG-AMPO

A. Personal nga pagkinabuhi

Ang kinatibuk-ang panaw sa kinabuhi ni Obispo Teofilo, kinabuhi sa pag-ampo o kun atong paladman, usa gyud ka pag-ampo. Iya kining gibansay nga puno  sa gugma ug kamakanunayon. Kini tungod kay gipili niya nga mamahimong iyang kinabuhi ang Dios mismo. Ang Dios alang kaniya anaa sa tagsatagsa nato ka mga kasingkasing. Ang iyang mga kaabag nga mga kaparian kanhi ang mihatag sa ilang panahom segun sa ilang kasinatian. Si Padre Joselito Danao nagkanayon: “Makanunayon ug makusganon si Msgr. Lololong sa iyang pagtulon-an mahitungod sa pag-ampo sanglit ang kinapungkayan ug tumong sa tawo mao man nga siya mahiusa sa Dios nga iyang magbubuhat. Kini gidasonan usab ni Padre Benjamin Cortes sa iyang pag-ingon: “Sumbanan siya sa pag-ampo ug iyang gipahimug-atan ang  kamahinungdanon niini sa atong inadlaw’ng pagkinabuhi.