Ang panaygon sa mgabata sa kadalanan

“Ayyy!!!” nakasinggit ang pipila ka mga babaye nga pasahero nga nagsakay sa PUJ nga 21A dihang ilang nakita nga hapit gyod madagit sa naghaguros nga taxi ang duha ka mga bata nga nanaygon sa manghunong nga mga sakyanan sa eskina sa dalan General Maxilom ug dalan M.J. Cuenco Avenue sa dakbayan sa Sugbo.

“Yheyyy!!!” sa babaye pa nga naglingkod sa atubangang lingkoranan nga nagtupad sa drayber sa PUJ nga daw gikuyawan nga nagtan-aw sa duha ka bata nga kalit lang nanglabang sa maong dalan nga mao usab ang paglabay sa naghaguros nga taxi nga nagsubay sa dalan Maxilom ug paingon sa North Reclamation Area.

“Pastilan,” sa drayber pa sa  PUJ nga nakakita usab sa maong hitabo. “Wala pa madali og gangi ang manobela sa drayber niadtong maong taxi mapunggit gyod tong mga bataa.”

“Asa man kaha ang mga ginikanan niadtong mga bataa,” mitimang usab ang gulangon na nga pasaherong babaye   nga naglingkod luyo sa drayber sa maong sakyanan nga pasaheroan.

“Gipasagdan man lang intawon tong  mga bataa nga gagmay pa man kaayo to sila,” mitubag usab ang lalaking pasahero nga naglingkod dapit sa pultahan. “Maayo lang mopakurog sa pagbuhat og bata ang mga ginikanan unyag naa na pasagdan na lang ug problema na hinuon sa ubang mga tawo kun maligsan.”

Ako nga nagsakay usab sa maong PUJ gikan sa dakbayan sa Mandaue nga naglingkod sa tunga-tunga nga bahin sa lingkoranan igo na lang sa pagpaminaw ug nakatuaw nga kuyaw  gayod ang panaygon sa mga bata sa kadalanan niining dakbayan ug maayo unta nga badlungon kini sa gitahasan nga ahensiya sa kagamhanan.