Nalikayan unta
Posible unta nga nalikayan ang dugang mga biktima sa Aman Futures Philippines kun gihimo pa sa mga Local Government Unit ang ilang trabaho pagsiguro nga lihitimo ang mga kompaniya nga ilang gihatagan og pirmiso nga maka-operate sa ilang dapit.
Ang Securities and Exchange Commission niadto pang buwan sa Agosto nipasidaan sa mga LGUs nga magbantay sa operasyon sa Aman apan bisan sa maong pahimangno nakahimo gihapon pagkuha og business permit ang maong kompaniya.
Ang Aman gihatagan sa dakbayan sa Sugbo og temporary business permit niadtong buwan sa Septiyembre, usa ka buwan human nipagawas og pahimangno ang SEC.
Si Budget Secretary Butch Abad miingon nga obligasyon sa mga lokal nga opisyal ang pagprotehir sa ilang mga molupyo. Apan ang maong obligasyon gisalikway sa mga opisyal sa dakbayan dihang ilang gihatagan og permit ang Aman.
Kun gihimo pa sa mga opisyal sa dakbayan ang obligasyon niini nalikayan unta ang pagkailad sa mga Sugboanon.
* * *
Nakahigayon ko og duaw sa probinsiya kagahapon ug nakapaniid sa kalihukan sa politika. Didto sa Argao dili ikahibulong nga kusog si kanhi Cebu City councilor Hilario "Junjun" David III tungod kay taga Argao man ang iyang pamilya.
Apan motuo mo og sa dili sagad sa mga butante labi pa ang tua sa bukid wala pa makaila ni Junjun. Ang ilang nailhan mao lang ang apilyedo niini ug ang amahan nga si kanhi Chief Justice Hilario David Jr.
Ang uban gani nagtuo nga si kanhi chief justice gyud maoy kandidato tungod kay mas makit-an pa ni didto sa Argao kaysa iyang anak.
Tataw nga gisalig ni Junjun ang iyang kampanya sa iyang amahan butang nga giayran sa pipila ka mga butante nga akong gikahinabi.
Matud nila nga kun karon palang nga angayan siyang mosuroy ug mangampanya dili siya magpakita sa kabukiran unsa na kaha kun modaog siya ug mamahimong gobernador sa Sugbo.
Ayaw ko og ingna nga ang iya gihapong amahan maoy mulihok sa iyang mga gimbuhaton ug obligasyon sa probinsiya. Kun ingon niini, nganong dili naman lang si kanhi chief justice Davide ang mikandidato?
Lahi man gud og batasan ang mga Pinoy tungod kay gusto ta og lider nga makita ug maduol.
* * *
- Latest
