Nagkanihit ang lubnganan

Diha toy balita diin gi-report nga dunay shortage kon kakuwang o kanihit na ron sa mga burial plots kon lubnganan sa mga sementeryo. Gani ang Catholic Bishops Conference of the Philippines (CBCP) misugyot kon miawhag sa kagamhanan sa pagpundar og dugang   mga menteryo.

* * *

Ato nang nahisgutan dinhi nga didto sa Europe dunay usa ka dapit diin ang mga patay gilubong nga pinatindog aron maka-save kon makadaginot og espasyo.

* * *

Duna say usa ka dapit didto gihapon sa Europe (nalimtan ta ang ngalan) diin napuno na sa patay ang sementeryo ug wa nay kalubngan ang mga bag-ong minatay. Isip paagi sa pagsulbad sa problema ang mayor sa maong dapit miisyu og kamandoan nga “wala una’y lumolupyo sa dapit nga mamatay.”

* * *

Si Arsobispo Oscar Cruz sa Lingayen misugyot kun lisud gyud nga solbahon ang shortage kon kakuwang sa espasyo sa mga menteryo, mahimong modangop sa cremation kon pagsunog kon paghimog abo sa lawas sa minatay.

* * *

Ang cremation matud niya gitugot naman ron sa Simbahan (Katoliko). Ubos sa cremation, ang abo sa patay isud ug tipigan sa urn kon urna ug ideposito sa columbarius. Gamay nga espasyo lang ang gikinahanglan.

* * *

Ok ra ni. Apan dili pa daghan ang columbarium ug kadtong mga napundar na grabeng mahala sa nitso nga kadepositohan sa abo. Gani naay mga lider sa komunidad nga misugyot sa mga simbahan o ba kaha mga parokya sa pagtukod og ilang columbarium para sa ilang mga namatay nga parishioner.

* * *

TRIVIA.Miduyog kita sa dakong kasubo nga gibati sa pamilya ni Marlon Bellita kinsa mipanaw na kalit ug sa bata pang pangidaron nga 42 anyos. Si Marlon sakop sa staff sa DyAB ug kolumnista sa  Banat News. “Marlon touched so many lives,” suma pa sa atong publisher.