Gikinahanglan ba ang pag-ilis-ilis og partido?

Sa atong political system, tubag sa maong pangutana: kinahanglan kaayo. In fact, alang sa uban, it is a must.

Angay hunahunaon nga tapus sa 2013 election, anaa gihapon si Presidente Noy, ug ang party in power, ang Liberal Party gihapon. Sa ato pa, maayo tingali nga mopasilong tang daan sa LP karon, kay sa unya na tapus sa election. 

Nga kun mudaog ka man karon nga election ubos sa laing partido, tingali’g maglisud ka unya pagbalimbing – ug matinuod na hinoon ang giingon nga magpuasa lang una ang imong mga constituents sulod sa tulo ka tuig.

Mga tilimad-on, atong nakita, this early, mora’g mao gihapon ang mahitabo sa sestima. Maoy atong naandan, nga bisan pa niadtong nag-two party system pa kita, inigdaug sa usa ka Liberal nga presidente, mag-inilogay dayon pagbalitok ang mga Nacionalista ngadto sa Liberal.

Inig daug sa Nacionalista, ang mga Liberal na poy maglumba pagpasilong ubos sa party in power. Misamot kini pagsagop nato sa multi-party system, diin gawas sa pagbalimbingay, ang uban natong mga lider, magdalidali dayon pagtukod og kaugalingong partido. Unya, kun mudaog, hugopan dayon kini sa atong mga lider. 

Pastilan. Unya, mangutana ka’g nganong wala mouswag kining atong nasud? Nganong mangutana ka man nga ikaw may nakaingon niining tanan, kaylagi, ikaw, lungsod, maoy labing gamhanan ug maoy nagbuot sa tanan.

Kahinumdom ko nga dihay giumol nga anti-turncoatism bill sa dugay na kaayong Kongreso. Nga kun nahimo pa kining balaud, gidili na unta ang pag-ilis-ilis og partido. Apan, kun ikaw usa ka magbabalaud, mosugot kaha ka nga dili ka makatapon ngadto sa laing partido?

Maoy hinungdan nga maglisud kita pagsagop sa electoral system sa America, tungod kay, among others, mao nay atong naandan, ug nahimo nang kabahin sa atong kultura ang pagbalimbing.

Walay bili ang partido. Yanoyanohon lang kini nato pagsalikway. Kadtong giingon nila ni Osmeña ug Quezon nga loyalty to party, wala na kini karon. Obsolete na. Mao kini karon ang atong kabalaka. Nga kun mao gihapon kini ang mahitabo, dili kita makapaabot og reform ug tiunay nga kausaban karong panahona, tapus sa 2013 election. Ang election, usa ka talagsaong higayon nga makab-ot nato ang gikinahanglan ug overdue na kaayo nga reforms.  

Apan, labing seguro kun ibaligya lang gihapon nato ang balaan natong katungod pagpili, 100% magpabilin kitang kabus as a nation.

Giingon nga ang pag-reform starts with you. Karon na ang panahon nga mag-reform kita,starting with you. Usa ra gyud ka adlaw ang gihatag kanato pagkab-ot paghimo’g kausaban. Tapus ning maong adlawa ... after election day, laing tulo ka tuig, either magmauswagon na kita, or magpadayon pag-antus.

Ikaw ra, lungsod ang magbuot niining tanan. Sa giingon, motuo ka’g dili, ang ugma sa atong nasud, anaa sa imong mga kamot. Tuo ka?