EDITORYAL - Ang kamatayon ni Marlon Bellita

Si Marlon maoy labing  bag-o  sa mga  membro sa media  sa Sugbo  nga mitaliwan  ug  mopanaw  na  ngadto sa  lubnganan.

Matag  tawo  nga may abilidad  ilabi sa natad  sa komedya sama  kang Marlon  di dayon  makalimtan  sa  katawhan  nga nalingaw  sa iyang  mga  komedya  sa  radio  ABS-CBN ug  ning mantalaan nga Banat News sa iyang lindog  nga Rated-R.

Mao lagi   nga kun  makabuot pa lang unta ta sa atong  kinabuhi, kaanindot unta  nga  magpadayon  ta  sa pagpakabuhi  bisan  pa  kun usahay  sungogon  ta  sa kasakit. Tinuod niining kalibotana, makatagamtam   kita  og  kalipay, apan  makadiyot  ra itandi  sa  mga  kasakit, kasub-anan, ilabi  na  kun  masugamak  kita sa kapakyasan  sa kinabuhi.

Apan kun  mahimo pa lang , kaayo unta  nga  di na lang  kita mamatay. Hinuon kun  atong  sutaon,  kinsa  bay tawo  nga  nagpabiling buhi  hangtud karon  gikan sa  pagkahimugso sa  unang tawo  nga mao  si Adan  .

Busa  kitang  tanan  di gyud kabalibad, inig-abot  sa adlaw  nga  papahuwayon  na  kita  sa Dios  nga magbubuhat  sa tanan ug naglalang sa tawo .

Tinuod kaayo  ang  nahisulat sa Biblia  nga nag-ingon “ang kinabuhi sa tawo sama sa inalisngaw nga sa makadiyot magpadayag  ug  sa kaulahian mahanaw lamang.”

Busa  ang  tanan  natong  nahimo  sa buhi  pa  kita  mahimong  handumanan  na lang   sa  mga minahal  nato  sa kinabuhi.

Sakit  kaayo  ang  bation  sa  matag usa  nga  biyaan  sa dayon  sa atong  gimahal, ug  nahimo  nato  kining  kinaiya  tungod  kay   nabuhi   kita   nga  may emosyon o pagbati  nga  mobati  og kaguol  sa panahon  sa kasub-anan  ug  mobati  usab og kalipay  sa panahon    sa kalipay.

Hinuon   sama  kang Marlon, didto  sa lubnganan  tua  ang  hingpit  niyang kamalinawon, ug  ang  iyang  mga  komedya  magpabiling  di makalimtan  sa iyang  mga  tigpaminawan sa radio   ug  sa tigbasa  sa Banat News. Bye  Marlon.