Prinsipyo ug track record
Saludo ko sa prinsipyo sa usa sa mga kapitan sa lungsod sa Tuburan nga giingong gisuwayan og suborno sa kampo ni kanhi mayor Rosemarie Suezo aron mosuporta sa iyang tinguha nga mobalik pagkamayor sa lungsod. Si Kapitan Renato Lapeña sa Barangay Kagba-o giingong gikuha sa mga lider ni Suezo niadtong Nobiyembre 3 ug gidala sa Lantawan Beach Resort diin didto gikatahong nahitabo ang pagpanuborno.
Si Lapeña usa sa 45 ka mga kapitan nga supporter ni Mayor Aljun Diamante. Ang kapitan giingong hugot nga namalibad kay dili siya buot magbudhi ni Diamante tungod kay mas daghan ni og nahimo sa ilang lungsod bisan duha pa lang ka tuig siya kapin nga namunoan.
Apan tungod sa iyang kahadlok ug sa pagpamugos sa mga lider ni Suezo napugos siya pagdawat sa P50 mil. Sanglit dili gyud madala sa iyang konsensiya ang pagbiya kang Diamante nahukman ni Lapeña ang pag-uli sa kwarta. Ang kwarta giingong giuli ni Lapeña ngadto nila ni Kapitan Tata Batal sa Barangay Colonia ug Kapitan Ramil Baflor sa Fortaleza. Ang pag-uli sa kwarta gihimo ni Lapeña atubangan sa mga sakop sa konseho sa barangay.
Si Lapeña giingong miangkon nga nagkinahanglan siya og kwarta tungod kay bag-o lang siyang nabiktima sa sunog. Apan bisan sa iyang panginahanglan wala niya ibaligya ang iyang prinsipyo.
Gisakripisyo niya ang kaugalingong panginahanglan tungod ug alang sa kaayohan sa ilang lungsod. Dili buot si Lapeña nga suportahan ang tinguha ni Suezo nga mobalik isip mayor sa ilang lungsod tungod sa kalamboan nga nahimo sa kasamtanga’ng administrasyon.
Dili na buot mobalik ang mayoriya sa mga kapitan sa lungsod sa karaang pamunoan tungod sa kausaban ug kalamboan nga ila karon nga napahimuslan ubos sa pamunoan ni Diamante.
Pipila sa mga kapitan miingon nga sulod sa taas nga panahon gidumala sa pamilyang Suezo ang ilang lungsod apan wala nila matagamtami ang mga programa nga ila karon nga gipahimuslan. Nakuryoso ko nganong ingon niini ang ilang pagdayeg ni Diamante hinungdan nga akong gisusi unsay iyang gihimo sa lungsod nga wala mahimo sa kanhi pamunoan.
Akong nasuta nga lahi ang pamaagi sa pamunoan ni Diamante tungod kay gawas nga wala niya kubraha ang iyang sweldo gikan sa lungsod, migasto pa ni sa iyang kaugalingon nga kwarta sa mga programa nga angayang pundo sa gobiyerno maoy gamiton.
Pananglitan dinhi sa dakbayan sa Sugbo matag birthday sa senior citizen duna silay cash gift gikan sa gobyerno. Apan didto sa Tuburan, dili hinuon kwarta, apan matag senior citizen dunay regalo nga cake gikan sa mayor.
Duna say daghan nga gigastuhan si Diamante nga mga estudyante isip iyang scholars gamit gihapon ang personal niya nga kwarta. Karong bag-o usa sa mga proyekto niya nga dako og ikatampo sa kalambuan dili lang sa lungsod kun dili sa katawhan nga mahatagan og kahigayonan sa panginabuhi mao ang iyang pagpananum og kape.
Duna na siyay kasabutan uban sa Nestle nga ang ilang kape paliton sa kumpaniya. Ang mga kabus inay nga mag-drive og trisikad sa lungsod, mahatagan og trabaho pinaagi sa pagpananum ug pag-atiman sa kape.
Kini ug daghan pa nga mga proyekto ni Diamante ang akong nasuta hinungdan nga ingon niini ang pagpangga sa mga kapitan ug sa katawhan niya. Matud sa mga kapitan wala magpapili si Diamante aron manginabuhi diha sa gobyerno sukwahi sa ubang politiko tungod kay duna siyay maayong negosyo dili lang dinhi sa Sugbo kun dili lakip na sa Mindanao.
* * *
- Latest
