Daw nahunong ang kalibutan dihang nakumpirmar ang kamatayon sa usa ka higala ug kauban sa trabaho nga si Marlon Bellita. Tangkod duha ka semana su’d sa Intensive Care Unit sa Chong Hua Hospital, dihang hilom ug malinawon nga nanamilit ang usa sa labing sabaan ug bungisngis nga personalidad sa radyo. Luyo sa kadaghan sa mga pakatawa ug mga panahon nga nag-uban sa tumang kasadya, makakugang ang balita nga nahanaw na ang usa ka Marlon Bellita. Ug sa paghinuklog, nagsagol ang emosyon kun angayan bang malipay nga nakapahuway na sa dayon si Marlon o angayan na ‘sab nga imong pangutan-on ang kahitas-an, nganong sayo niyang gikuha ang kinabuhi sa usa ka tawo nga naghatag og kalipay sa minilyon ka mga tawo sa matag adlaw niyang programa.
Kun usa ka sa mga tawo nga nakaduaw ni Marlon sa tambalanan, posibleng usa ka sa mga tawo nga sayon rang makadawat sa iyang kamatayon. Di’ lalim ang kondisyon nga iyang gibati ug labaw nga di’ sayon madawat nga napuno na sa tubo ug mga ekipo ang iyang lawas. Ang usa ka tawo nga nagda’g kapin sa 25 ka mga tingog, karon hingpit nga gipahilom sa kahigayonan apan ang iyang mensahe—lanog sa atong tagsa ka kasing-kasing. Maisip nga usa ka yanong kinabuhi lang ang gisubay sa usa ka Marlon Bellita, apan ang mga kinabuhi nga iyang nahikap ug nahatagan og kalipay, di’ maihap. Mao ni ang usa sa mga kabilin nga di’ matupngan sa grupo sa mga talento nga anaa karon sa nagtikaw-tikaw sa radyo.
Ang pag-amping sa lawas ang labing lanog nga mensahe nga gibilin sa usa ka Marlon. Wa’ gitago ni Marlon sa iyang tigpaminaw ang kahimtang sa iyang panlawas. Niabot ang punto nga nagpadaot pag-ayo si Marlon pinaagi sa pagdagan. Nagmalampuson siya sa maong lakang tungod kay nahimo namong duha nga sungog nga mas dali pa siyang nakapagamay sa iyang tiyan. Gidayeg sa buhatan si Marlon tungod sa iyang determinasyon nga magpadaot isip tambal sa iyang gi-antos nga taas nga dugo ug ang posibleng pagsaka sa iyang sugar. Wa’ gitago ni Marlon nga nakasinati siya og mild stroke nga nisangpot sa paghatag kaniya og maintenance nga tambal. Apan wa’ ‘sab gitago ni Marlon pinaagi sa iyang mga pasiaw nga di’ siya sinsiro nga nitumar sa iyang mga tambal.
Ang labing dakong kabilin ni Marlon mao ang pagkatawa sa matag adlaw luyo sa mga kalisdanan nga giatubang. Kini ang usa ka rason nganong di’ matupngan ang pagmahal sa mga taxi driver ngadto sa usa ka Marlon Bellita. Ang mga pasiaw ni Rated R ang labing dakong kontribusyon ni Marlon sa mga tawo nga tunga-tunga sa kalisud sa matag adlaw nga trabaho, adunay alas kuatro sa hapon nga ilang gilantaw sa matag adlaw aron nga mokatawa ug kalimtan sa makadiyot ang kadaghan sa mga obligasyon. Usa ka talagsaon nga mithi ang pagpakatawa ug kini ang usa ka gasa nga gibuhos sa kahitas-an sa usa ka nilalang ug inay ihikaw, iya ning gitunol ngadto sa mga tawo bisan kun siya nag-atubang ‘sab og mga pagsuway sa matag adlaw.
Sa iyang kamatayon, daghang nahikap nga kinabuhi ang usa ka Marlon Bellita. Usa ka lanog nga mensahe ang iyang gibilin nga di’ diay mahimong aspeto ang pangidaron o pila ka katuig kang gipiyalan sa kahitas-an sa pagduma’ sa kalibutan, apan ang labing mahinungdanon pila ka mga tawo ang imong nahikap, pila ka kinabuhi ang imong nahatagan sa inspirasyon ug pila ka mga nilalang ang nabuhian sa ilang paglaom tungod sa imong mga pakatawa ug pagpadayag sa imong talento. Ang usa ka Marlon Bellita, mas dako pa sa itandi sa iyang programa, itandi sa iyang wa’y kinutuban nga pag-alagad sa katawhan, itandi sa iya mismong kinabuhi. Mubo kun tan-awon ang mga panahon nga nakauban ang usa ka nilalang, apan igo na ning tanan aron itunol ang wa’y kinutubang pasalamat.
Email: rico_lucena@abs-cbn.com. or ricolucena@yahoo.com.