EDITORYAL - Mahinayon gyud ang pagtukod og flyover

Karon  nga nadeklarar na sa Malacañang nga matukod  pagdayon  ang  flyover sa MJ Cuenco Ave. murag   mawagtang   na  ang  kisaw  sa  mga  misupak  sa maong proyekto.

Kay nagpasabot  man kini  nga  bisan og giunsa og hiwasa  sa  mga  grupo  nga  nakigbatok  sa maong  proyekto, mipasulabi man  ang  kaikag  sa Malacanang  sa pag-uyon sa mahinayon  kini.

Hinuon  ang  kauban   niini  nga adto unta sa Gorordo Ave.  itarok  di  na  mahinayon.

Ang  tingog ug pagbuot  sa Malacanang  lisud  na  nga tuison  ug  supakon kay  una  sila  mopakanaog  sa maong  desisyon ila  baya  kining  gitun-an  pag-ayo.

Mahimong  ang  nagpasulabi  sa galamhan  sa taga  Malacanang  mao  ang  pagdapig   sa  gipasigwar  sa  nagproponer  sa maong  proyekto  nga importante  kaayo  kini. Apan   kun sutaon ang sentimento  sa mga  motorista  ug  mga molupyo  sa  Cebu City naglabi  baya ang  wa mopabor  niini  kay  ang labing  gikinahanglan  karon mao  ang  pagpangayo  sa  mga  imbornal  o drainage system nga nagkinahanglan  usab  og  dako kaayong gasto.

Sa panahon  nga mobundak  ang  uwan, nagkalainlaing  lugar  sa  siyudad  ang  lunopan ug di basta-basta ang kahasol  sa  mga motorista ug sa  katawhan

`Ang gusto unta  sa  mga  tawo nga  kun gikinahanglan man  ang flyover, ipaulahi unta kana, ug unahon  ang  pag-ayo  sa  mga  imbornal aron  way lunop  nga  mahitabo  sa panahon sa  ting-uwan.

Sa laing bahin  ang  mga  mipabor  sa flyover  nangatarungan usab  nga ang baha  mahitabo  lang  kun  mag-uwan, apan  ang kalangay  sa mga  motorista  nga molabang  sa mga eskina  sa Mango Ave. ug  MJ Cuenco Ave, mahitabo sa tanang segundo  sa tanang adlaw, demudo  angay  unahon  ang  pagtukod sa flyover.

Dihang nasuta  sa  Malacanang  nga  may gibug-aton usab  ang  katarungan  sa  mga  pro-flyover, nakahukom  kini  nga  paboran  ang maong proyekto.

Unya  tungod kay daghan man kaayong  eskina dinhi nga pirmi  gahuot ang sakyanan, murag pipila ka tuig gikan karon  kada eskina may flyover na.