Mr. Barangay

Brgy Colon, Naga City

“Tabangi mi palihog Sir nga mapaagasan mig tubig diri sa among lugar kay pait kaayo among kahimtang diri, among mga opisyal sa barangay palingoglingog ra man mura’g wa makakita sa among kahimtang diri nga mga molupyo "

Brgy Poblacion, Cordova, Cebu

“Hangyo mi nimo Sir nga ipasusi diri sa DENR legal ba ning mga modunggo diri nga mga dagkong pumpboat nga magkarga’g mga kahoy kay makaduda man ang mga lihok kasagaran na sila modunggo diri mga alas dos sa hapon.”

Brgy Sangat, San Fernando, Cebu

“Luoy kaayo ang mga molupyo diri dapit sa may Globe Tower paingon sa baybayon kay walo na gyod ka buwan nga way agas ang tubig, ka lima na ka higayon kong ni-report ani sa kapitan pero wala gyu’y aksyon.”

Brgy Pakigne, Minglanilla, Cebu

“Naunsa naman ning among lugar nga kusog pa man gihapon ang jai-alai diri kun masiao wala man gyud ni aksyoni sa mga polis, unya usa daw sa coordinator ani opisyal sa barangay mao nga wa gyud ni  masumpo.”

Brgy Baring, Carmen, Cebu

“Hangyo mi sa probinsya sir Jun nga ipaayo intawon ning among karsada sa Veto kay gubaon kaayo, nabuldos niadto pang 1996 pero karon problema gyod estudyante labi na kun mag-uwan kay lisod kaagian ang karsada.”

Brgy Guadalupe, Carcar City

“Naunsa naman ning among mga opisyal sa barangay sir Jun nga wa man gyud katagad aning problema sa karsada sa Sagrada nga pwerteng gubaa, dugay na ning hangyo sa mga molupyo nga hatagan og pagtagad pero wala gyu’y aksyon.”

Brgy Banilad, Cebu City

“Sa J Panis street kay naghitak ang sugal ug illegal nga drugas, naay usa ka tindahan diri nga kun manira maoy himuong sugalan ug abutanan aning mga nagpayuhot og illegal nga drugas, maayo unta’g aksyonan ni sa mga polis.”

Brgy Binaliw, Cebu City

“Kaming mga batan-on nagpaabot unta sa mga proyekto ug mga programa sa among SK officials labi na sa SK chairman diri sa among barangay pero hangtod karon wala man gyod, sige lang ingon nga busy sa school nga unta gidawat man ni niya nga obligasyon.”

Brgy Bato, Toledo City

“Tabangi mi diri sir Jun sa sitio Talisay kay naay namaligya diri shabu, maayo unta maaksyonan dayon ni sa awtoridad kay kuyawan ming mosanay ni diri illegal nga drugas unya maangin intawon ang mga bata nga nag-eskwela.”

Brgy Busay, Cebu City

“Naghitak naman ang sugal diri sa among lugar Sir labi na sa Housing dapit kay klaro kaayo na sila sa mga tawo, dili gyod na ikalimod kay bisan amo kapitan makakita ana nilang nagsugal, maayo untang badlungon na kay lain tan-awon.”

Brgy Tingub, Mandaue City

“Palihog mig pabadlong aning usa namo ka konsehal sir Jun kay naa lang pirmi sa sugalan diri sa sitio Tondo, bati man gud tan-awon ang usa ka lider sa barangay nga mao untay model mao man hinuoy mag-una sa sugalan.”

Brgy Pardo, Cebu City

“Hangyo mi sa tagdumala sa public market namo diri nga ipasusi tawon ning mga naninda diri kun kumpleto ba’g permit kay unfair para namong nagbayad unya naay mga stalls diri nga way sanitary permit.”

* * *

Alang sa inyong mga reklamo text lang sa 09071678643