Ang atong kinaiya

Ang kasamok sa kalibutan maoy epekto sa nagkalain-laing kinaiya. Magkalahi ang pamaagi ang anaa sa hunahuna o sa himoong disisyon aron hiusahon ang nagkabangi nga mga panlantaw o pangagpas, bisan sa usa lang ka yanong butang nga buot tukion. Di kita kapaabot og diha-diha nga solusyon, gumikan  sa tagsa-tagsa ka tawhanong kinaiya. Nga naumol gikan pa sa tagoangkan nga natibook ang atong pagkatawo, gumikan sa mga  genes o gigikanang kaliwat nga gipakatawo kita nga may talagsaong sangkap niani isip ato nga personal nga kinaiya. Gani sa pamilya, usa ra sila apan di pareho ang mga kinaiya, di ba?

Sa ato pa, kinsa ug unsa ka man, ikaw gayud kana. Nga ang  personal nga kinaiya sagad napanunod sa kombinasyon nga kinaiya sa ginikanan. Kun gi-unsa kita pagmatuto, sa inahan o amahan, molahi o molutaw gayud ang kinaiya sa anak. Apan mag-agad usab kini sa namat-an nga pagdisiplina. Inigkahamtong medyo may gamay kausaban. Mas mokomplikar gani kini kay tungod sa pakigsandurot sa isigkatawo, maimpluwensyahan na ang kaugalingong kinaiya. Makat-on na sa pagsundog aron ikasabot sa uban. Mapugos sa pagkontrol nga mag depende usab sa kalig-on sa kompyansa sa kaugalingon ug sa makauban.

Mahimo kitang burong kun di kita kaantigo makisama o makighigala. Nagkinahanglan kita’g edukasyon o pagtoon, pinaagi sa kasinatian sa uban kun unsaon mahimo kitang angayan ug mapuslanon diha sa mga  kalihokan. Maniid, mag-obserbar nga may madanihon ug kawilihan nga pamatasan. Nga hugopan ug di pul-an sa atong kinaiya nga maantigong mosabot sa kinaiya sa uban. Kun ingon niini kahalapad ang pagtugkad mo sa mga kinaiya, respetohan ka nila.