Drugs gipasad sa eskuylahan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gipakatap sa mga daotang elemento karon sa tibuok kalibotan ang mga candies ug lollipop nga makahilo tungod sa gisagol nga crystal meth, kamatang sa drugs nga makakutlo’g kinabuhi. Nindot ug makaiibog kaayo ang porma sa maong mga kendi nga ang kahumot ug kalami sama gayod sa strawberry, chocolate, orange ug uban pa.

Mga bata ang sagad target ning maong grupo. Mga eskuylahan sa elementariya ug hayiskol ang ilang rumbo sanglit dali ra man maibog ug madani niining matanga sa pagkaon.

Delikado ang makakaon niining gitawag nila’g strawberry meth nga mga candies ug lollipop kay kini makamatay. Gipahimangnoan ni Ms. Vivian Montero Caumera, Pinay nga atua na magbase sa Amerika, ang tanang ginikanan nga magbantay ning modernong binuang aron dili mabiktima ang ilang mga anak. Gidasig ni Vivian ang mga parents pagpasidaan sa ilang mga kids sa dili pagdawat-kaon sa ipanghatag nga kendi diha sulod ug gawas sa eskuylahan -- kaila man o dili ang motunol niini.

Usab gihangyo ang mga kadagkoan sa eskuylahan ug mga militar nga magbinantayon kanunay aron kaprotektahan ang kinabuhi sa mga inosente.