Pangandam na

Nahinumdom ba kamo nga samtang magsingabot na gani ang pangilin kon kapistahan alang ni Senyor Santo Niño motumaw dayon kining isyu kabahin sa paghatag og dakung donasyon sa dakbayan alang sa Sinulog Foundation Incorporated?

Nahadlok ko nga tungod kay bisi na kaayo si Mayor Michael Rama ug ang ubang opisyal, ingon man wala maghuna-huna niini ang iyang mga sinaligan, makasinati na usab og problema ang dakbayan kun unsaon pagdonar og salapi ngadto sa Foundation aron gamiton sa pagpahigayon og Sinulog mardigras.

Si Mayor Rama maoy overall chairman sa Sinulog Foundation Inc. kay dili man gayud siya mo-resign sa maong katungdanan aron unta walay problema ang paghatag og dakung kantidad sa donasyon alang sa foundation.

Duna man go’y lagda ang Commission on Audit (COA) nga ang mga local government units gidid-an sa paghatag og mga hinabang sama sa kwarta ngadto sa lainlaing Non-Government Organizations (NGO) nga ang mga opisyal sa LGU opisyal sa maong mga kahugpongan.

Ang ako lang ba nga tagdon na unta kini mentras duha pa ka buwan gikan sa kapistahan ni Senyor Santo Niño. Basin og adto na kita unya magkisi-kisi kun duol na ang kalihukan. Mao ra ba g’yud kini ang sagad himoon sa ubang opisyal sa City Hall.

Aw tan-awa ra gud ang pagsumiter nila og dukomento nga nangayo’g budget alang sa pagkaon sa mga mobantay sa mga menteryo, gihimo dihang usa ka semana na lang og Kalag-Kalag na. Unsaon, dunay mga opisyal nga maayo lang modawat og sweldo apan nagpasagad ra sa ilang trabaho.

* * *

Ang higala nako nga opisyal sa City Hall miingon nga maayo kuno nga mosulod ko sa gobyerno aron masayud ko nga dili usab sayon ang ilang trabaho. Wala ko makapugong sa pagkatawa kay ayaw ko’g ingna nga mas lisud ang trabaho sa gobyerno kay sa private office?

Ang ako gani nga mga higala nga kauban sa media dihang mibalhin sila sa pagtrabaho sa gobyerno, ako g’yud nga giingnan nga “Hala matapolan ka g’yud.” Wala ko masayup kay dihang nagtrabaho na sa gobyerno ang akong higala giangkon g’yud niya nga pwerteng hayahaya sa trabaho sa gobyerno.

Daghan man gud kaayo nga mga sitwasyon nga makita nako nga nagtinapolan ang mga nagtrabaho sa kagamhanan. Sa City Hall, wala g’yud nila sunda ang higala nako nga si City Administrator Jomar Poblete nga magkatuyok-tuyok na lang tawon sa kabisi.

Kuhai lang og basi nga kaming mga reporter mangita og balita ug sa usa ka adlaw usahay mosuwat mi’g duha ngadto sa upat ka balita. Walay labot sa mga ligoy ‘sab nga mga sakop sa media kay mosuwat ra man og usa.

Sama nako, gawas nga mosuwat ko’g tulo ngadto sa upat ka balita, magsuwat pa ko’g lindog ug sugilanon sa Banat News, unya reporter pa ako sa radio station DYLA.