Asawa gibiyaan sa bana, mamahimo bang basihan sa annulment?

Ang kaminyuon kon marriage gipanalipdan gyud sa atong balaod hinungdan nga dili kini basta-basta nga mabalewala. Apan ang atong Family Code adunay gilatid nga mga basihan kon grounds kun kanus-a nimo mamahimong ipaputol sa Korte ang imong kaminyuon? Kana nga pangutana ang atong tukion karon.

* * *

Dear Atty. Divine,

Pito ka tuig na ko nga gibiyaan sa akong bana ug wa mi anak. Wa na ko masayud kun asa siya nagpuyo karon kay wa gyud mi communication sukad sa among panagbuwag apan basi sa akong nahibaw-an gikan sa iyang paryente nga nagminyo na kini og lain ug matud pa aduna na kini duha ka mga anak. Plano unta nako Atty. nga ipa-annul sa korte ang among kaminyuon, unsa may akong basihan sa pagpa-annul sa among kaminyuon? Unsa may una nakong buhaton atty? Hinaut imo kong matabangan sa akong problema. — Fely

* * *

Dear Fely,

Ang Family Code naglatid sa mga basihan kon grounds alang sa pagpa-annul sa kaminyuon o pagdeklarar niini nga void. Usa sa mga basihan sa annulment of marriage mao kining mosunod: 1) Absence of Parental Consent 2) Mental Illnes 3) Fraud 4) Force, Intimidation or Undue Influence ug uban pa. Kun declaration for void marriage, ang grounds niini: 1) Way marriage license 2) Way legal capacity or minor de edad ang usa sa gikasal  3) way authority ang solemnizing officer  4) Psychological Incapacity ug uban pa. Kanang panagbuwag sud na sa pipila ka tuig o pagbiya sa imong bana kanimo sud na sa pito ka tuig dili kana igong basihan alang sa pagpa-annul sa kaminyuon. Ang maayo nimong buhaton karon mao ang pag-adto og abogado aron iyang ma- evaluate ang imong kaso kun unsay mamahimo niining grounds alang sa pagpa-annul sa imong kaminyuon ug aron iya sab kang mapasabot kun unsay proseso sa annulment. Salamat sa imong pag-email. — Atty. Divine

Alang sa inyong pangutana, ipadala lang sa Legal Corner sa Banat News or email sa [email protected].