Wa kaha ni binuang?

Dili tanan sa mga polis ug tanod ang nakakaon sa “food pack” nga gi-order sa Cebu City Hall para sa mga nagbantay sa lainlaing menteryo sa tulo ka adlaw gikan Oktobre 31, hangtud Nobiyembre 2.

Ngano man ni? Gidayeg nako ang ubang polis nga sama sa tulo ka batan-ong polis nga nadistino sa Waterfront Police Station nga nadistino sa Dona Pepang Cemetery kay wala na lang sila mokaon sa para kanila.

Apan bisan pa og wala mokaon ang tulo ka polis dili gihapon maapod ang mga tanod kay lima ra ang gihatag nga food packs unya daghan ang mga tanod.

Usa ka opisyal sa City Hall mitug-an nako nga kay gidugay-dugay man kuno sa Cebu City Council ang pag-aprobar sa gipangayo nga P495,000 nga adtoa unta kuhaa sa “Pagcor Funds” aron ipalit og 4,500 ka food packs, mimando na lang si Mayor Mike Rama nga mangita og laing kwarta nga magamit.

Kun ang P495,000 nga kantidad maoy basihan, basi sa dukomento nga gisumiter sa konseho, tag P110 ang kantidad sa matag food pack. Tan-aw nako sa mga pagkaon nga gihatud para sa mga nagbantay sa mga menteryo, mokantidad lang subra sa P50.

Ang usa ka hiwa nga sud-an-karne ibutang na lang nato nga P30, unya ibutang usab nato nga P10 ang kan-on ug P10 ‘sab ang bottled water, P15 ‘sab ang gamay’ng tipak sa “cake” ug P5 para sa pack. Pila ang tanan? Gipasubrahan lang nako ang presyo.

Nganong dili man tuod kwarta lang ang ihatag nga honorarium sa mga motabang sa kapolisan pagbantay sa mga menteryo? Aw hinoon kun kwarta, wala may makomisyon.

Kun sakyan nato ang giingon nga lahi na lang nga budget ang kuhaan sa pagbayad sa maong mga pagkaon, unsay mahitabo kun ang gipangayo nga P495,000 nga budget sa City Council maaprobahan? Unsa may bayran niadto?

Nakabantay ra ba g’yud ko nga sa matag Kalag-Kalag kanunay nga tag P495,000 ang pangayoon nga gahin alang sa pagkaon, apan pipila ka semana human sa Kalag-Kalag dunay laing resulosyon nga magpagahin na usab para gihapon sa pagkaon.

Tungod niini, makapaduda na nga dunay binuang. Nganong nakaingon ko nga adunay binuang? Nihit kaayo ang pagkaon nga miabut sa mga sam-ang. Gawas nga nihit, dugay pa g’yud kaayo miabot.

Kun matinuod man gani nga tag P110 ang kantidad sa matag food pack, pastilan klaro kaayo nga dunay nakakomisyon sa maong transaksyon. Kun walay nakomisyon, moingon ko nga nagdanghag lang ang mga gitugyanan sa pagpalit sa maong pagkaon kay mahal ra kaayo.

* * *

Naluoy ko sa akong amigo nga si Marlon Bellita kay nag-ungaw karon sa kakuyaw ang iyang kinabuhi human siya atakeha sa iyang sakit.

Luoy kong Marlon kay dili man ni siya sama sa uban nga kun mag-party kusog kaayo nga manguha og litson aron dad-on sa ilang balay. Buotan ni si Marlon nga higala namo ni City Administrator Jomar Poblete.

Nakahinuktok ko kay nasabtan nako nga ang kinabuhi sa tawo takulahaw lang nga adunay kausaban. Ang maayo g’yud nga magbinuotan ta. Swerte si Marlon kay naila g’yud siya sa iyang programa nga komedyante.

Sa laktud walay nasuko kaniya. Sagad sa maminaw sa iyang programa makakatawa. Dili sama nako nga mangasuko ang maigo. Apan mag-unsa man kun wala na la’y mosaway ug mopasabut sa katawhan sa mga isyu?