EDITORYAL - Unsa kahinlo ang mga water dispenser

Luoya  sa  mga tawo  ilabi  na sa mga  estudyante kansang tutonlan magdaguok  iniglamoy  sa tubig  nga anaa  sa  mga  water dispenser  nga peso-peso  sa mga sidewalk, eskuylahan, kan-anan ug bisan asa ning dakbayan.

Wa gyud intawoy  kalibotan  nga  ang  lamog-lamog  sa  ilawom  nianang dispenser sama  na  kabaga  sa  sapa sa Palma  ug  ang  pito-pito  sa sulod  niini pila na kaha ka libo

Ang mga  dispenser  nga anaa  sa sidewalk  nga  wa   hisayri kun  mineral water  ba gyud  ang  gigamit  niini  ug wa hisayri kinsay tag-iya,  anaa nay  tagduha ka tuig  nga way hugas-hugas  ang  sulod sa dispenser.

Ang   mga may  dispenser  sa ilang  balay nasayud  nga sa usa ka semana  kun  di  kahugasan  ang  sulod  sa dispenser, magkapal  na  ang  lamog-lamog  o linugdang  nga hugaw  sa  tubig.

Kauban  sa maong  lamog-lamog  mao  ang  mga pito-pito  nga  maglabo.

Kun  sa usa ka semana  nga  di  kahugasan  ang maong  dispenser magkapal  na  ang  lamog-lamog, unsa  na  kaha  ang dispenser nga   wa kahugasi  og  usa o duha ka tuig.

Aw hinuon  tungod  sa kakusog  manginom  sa katawhan  ilabi  na  sa  mga  dispenser  nga anaa sa sulod  sa eskuylahan  ug  mga restaurant, maiban-ibanan  tingale  ang  maong  hugaw  nga lamog-lamog ug  ang  mga pito-pito   matag  adlaw.

Karon  pa makahunahuna  ang  mga  mga konsehal  sa dakbayan  sa Sugbo  nga angay diay  inspectionon  kining maong   mga dispenser.

Kay  ang  mga  konsehal  sa siyudad   way  pagpakabana  bahin  sa kahugaw  sa  mga  dispenser  nga di kahugasan  matag  semana.

Mura  sila  og  way  dispenser  sa ilang  balay, hinungdan  nga  nagpakabuta–bungol  lang  usab  bahin   niining  butanga. Apan karon  nga nakahunahuna na sila, mas maayong panid-an nato unsa sila  kahigpit  sa pag-atiman  sa  panglawas  sa katawhan  gikan  sa hulga  sa  kahugaw  sa  mga dispenser  nga  way  hugas-hugas.