Ning milabay’ng pipila ka adlaw ubay-ubay’ng mga aksidente sa kadanan ang gibalita sa mga mantalaan ug tv/radyo. Daghang kinabuhi ang nausik.
* * *
Mga sakyanan de pasahero, sama sa bus ug jeep, ang nalambigit niining maong mga aksidente. Ug ang unang gipasanginlan mao ang mga depekto sa sakyanan sama sa preno kon brake, hilis na nga mga ligid, ug uban pa.
* * *
Apan ang angayan gyud diay nga hatagan og pagtagad mao ang drayber nga nagmaneho sa sakyanan.
* * *
Nahibaw-an sa mga imbestigador sa mga aksidente didto sa kauluhan, sa Mindanao, ug dinhi sab sa ato sa Sugbo nga dili kanunay ang depekto sa sakyanan maoy hinungdan sa aksidente kundi usab ang kondisyon sa mga drayber.
* * *
Naay mga disgrasya sa kadalanan diin ang kondisyon sa sakyanan -- kanunay ang preno -- maoy pasanginlan sa aksidente. Apan ang tinuod nga hinungdan diay mao ang drayber.
* * *
Matud pa sa mga taga MMDA didto sa kauluhan kinahanglan gayud nga susihon sa operator sa mga sakyanan, sama sa bus, ang kondisyon sa drayber. Wala ba kini makainom og alak, husto ba ang kinatulgan niini, wa bay sakit nga gibati sa lawas, etc.
* * *
Ang MMDA ug LTFRB mi-require sa mga drayber nga magpaubos sa training, sama sa training ubos sa TESDA, una kini hatagan permiso sa pagmaneho og sakyanan de pasahero. Daghan kunong drayber nga wa masuhito sa kondisyon sa ilang gidrayban ug kun madisgrasya ipasangil lang sa preno kon brake ug uban pang depekto sa sakyanan.
* * *
TRIVIA. Salamat kang reader Buddy Artes nga taga San Fernando sa gitampo niya nga input alang ning atong lindog karon. Salamat sa suporta sa Banat News, Mr. Artes.