EDITORYAL - Ang Adlaw sa mga Santos
Karong adlawa gitamod sa mga Katoliko nga Adlaw sa mga Santos ug bisan wa kaayo masuta kun pila nay gidaghanon sa Santos Katoliko sa tibuok kalibotan, ang labing siguro nga sa 95 ka milyon ka mga Filipino karon duha pa ang nahimong santos.
Ang mga Santos nga giumol sa mga paring Katoliko ubos sa pagbuot sa Santo Papa sa Roma maoy gipahinungdan og adlaw nga saulogon matag Nobiyembre 1, sa matag tuig,
May mga Santos nga dangpanan sa mga bata, may dangpanan sa mga ulitawo ug daga, may ampoanan sa magtiayon, may dangpanan sa mga Senior Citizen, may dangpanan sa mga negosyante, may dangpanan sa mga mag-uuma, may dangpanan sa mga mananagat, may dangpanan sa mga biyahidor, may dangpanan sa mga sugarol, may dangpanan sa panahon sa mga katalagman sama sa mga bagyo, linog, baha, buto sa bulkan ug uban pa.
Kining mga Santosa maoy gihatagan og pasidungog niining adlawa tungod kay anaa na kanila ang tanang pagbati sa mga tawong Katoliko kay sila ang girekomendar sa mga kaparian nga angay alagaron, pasidunggan ug hatagan og kahimayaan kay sila ang manluluwas ug mosalbar sa tanang panginahanglan sa tawo.
Mao man gani nga inigkasakit sa tawo mangayo dayon og tabang sa bisan haing Santos nga suod niya ug inigkaayo tua siya magpasalamat sa maong Santos apan kun mamatay Dios na ang pasanginlan nga maoy nagbuot sa iyang kamatayon.
Ang pulong santos hubad sa Inenglis nga saints, nga sa Biblia mga tawong balaan kansang sala napasaylo pinaagi sa dugo ni Cristo.
Kun ang mga paring Katoliko nag-umol og mga tawo nga gihimo nilang Santos o santosonon pa, ang Dios nga magbubuhat sa tanang mga butang lakip na ang tawo, may giumol usab nga mga tawo nga gihimo Niyang balaan o mga santos. Ang Iyang giila nga mga santos, maoy Iyang gisaaran nga papuy-on sa langit sa walay katapusan, samtang kadtong wa Niya ilha nga santos gitagana Niya sa imperno sa way katapusan.
Maayo unta kun ang giumol sa mga pari nga Santos nailhan usab sa Dios.
- Latest
