Unsay buhaton kun mawala ang titulo sa yuta?

Ang titulo sa yuta, panimalay ug uban pang mga kabtangan maoy labing lig-ong dokumento nga magpamatuod sa imong ownership sa usa ka property. Ang kabtangan sab nga titulado mas mahal ang presyo kun itandi sa usa ka property nga way titulo. Apan kun mahanaw ang imong titulo sa imong yuta ug uban pang kabtangan, unsay angay nimong buhaton? Kana nga pangutana ang atong tubagon karon.

Dear Atty. Divine,

 Maayong adlaw kanimo ug sa tanang readers sa Banat News. Nag-email ko nimo tungod sa among problema sa among titulo sa yuta. Ang among mga ginikanan nangamatay na ug ang kabilin nilang yuta nabalhin na sa pangan namong tulo ka magsuon. Ang akong usa ka igsuon maoy akong gitahasan sa pagkupot sa maong titulo ug karong bag-o sa dihang amo siyang gipangitaan kay dunay interesadong mopalit sa maong property wa na man niya makit-i ang maong titulo ug nawala kini. Ang buyer gusto gyud nga motan-aw sa titulo ug unsa may maayo namong buhaton niini? Hinaut imo ming matambagan sa among problema.— Roger

* * *

Dear Roger,

Sa akong tan-aw, dili lang ikaw ang nakasinati og susamang problema nga nawad-an og titulo nga usa sa labing importanteng dokumento kay dili man kini basta-basta nga mailisan. Kun di gyud makit-an sa imong igsuon ang inyong owner’s duplicate sa certificate of title sa inyong yuta, ang una ninyong buhaton mao ang pagpahibawo sa Register of Deeds sa lugar nga maoy nahimutangan sa inyong property pinaagi sa pagduso og Affidavit of Notice of Loss o notisya sa maong buhatan nga nawala ang inyong titulo. Human niini, mopasaka mo og petition ngadto sa Korte alang sa pag-issue og bag-ong duplicate sa certificate of title. Adunay hearing nga pagahimoon ang Korte ug kinahanglan inyong pamatud-an nga nawala gyud ang maong titulo aron mahatag sa Korte ang inyong gipangayo nga bag-ong owner’s duplicate sa certificate of title. Kini nga paagi basi sa nalatid sa Section 109, Chapter X sa Presidential Decree No. 1529 nga nagkanayon:

Sec. 109. Notice and replacement of lost duplicate certificate.—In case of loss or theft of an owner's duplicate certificate of title, due notice under oath shall be sent by the owner or by someone in his behalf to the Register of Deeds of the province or city where the land lies as soon as the loss or theft is discovered. If a duplicate certificate is lost or destroyed, or cannot be produced by a person applying for the entry of a new certificate to him or for the registration of any instrument, a sworn statement of the fact of such loss or destruction may be filed by the registered owner or other person in interest and registered. Upon the petition of the registered owner or other person in interest, the court may, after notice and due hearing, direct the issuance of a new duplicate certificate, which shall contain a memorandum of the fact that it is issued in place of the lost duplicate certificate, but shall in all respects be entitled to like faith and credit as the original duplicate, and shall thereafter be regarded as such for all purposes of this decree.

Ang maayo ninyong buhaton karon mao ang pag-adto og abogado aron magpahimo og Affidavit of Notice of Loss alang sa Register of Deeds ug human niini mao ang pagpasaka og petition sa Korte alang sa pagpangayo og bag-ong owner’s duplicate sa certificate of title. Hinaut nga akong nahatagan og katin-awan ang imong problema. Daghang Salamat. Atty. Divine

Alang sa inyong mga pangutana, ipadala lang sa Legal Corner sa Banat News or email sa [email protected]