Sa probinsya, diha sa mga dapit o banika nga dasok kaayo sa mga pananom, ilabi nga may nangumbitay nang daghang bunga, makalipay sud-ongon ang kabulahanan sa maong lugar. Usahay sad masagmuyo ta, kay may makita man usab kita nga way mga tanom nga kapuslan gawas sa kakugnan o kabugangan.
Dili nato kini ikahibulong kay tingali ang nanagpuyo didto, duna pay wala kaayo masayud o makaamgo sa dakung kapuslanan sa pagpananom. Kun may mga mamungang punoan o tanom diha sa atong tugkaran, maghatag ni’g mga lab-as nga hangin o oxygen sa atong palibot.
Gawas sa masustansyang bunga nga kaonon, moprotehir sad ni nato gikan sa toxic o radiation, ilabi na ang balay nga duol ra sa posteng may transformer sa kuryente o communication towers.
Sa dakbayan kun wa tay tugkaran, pwede ta mananom diha sa kaang o basiyong baril, balde uban pa. Mahimong ipamitay o ipalibot diha sa balay ninyo. Hayahay kaayo pamation kun mapuno sa tanom ang lugar. Mas maayo kanang mamunga sama sa lemon, tambis, kapayas, tsikos o uban pang klase sa tanom.
Aron iyawat sad makakaon sa mga masustansyang prutas nga walay gasto. Kun ang atong tugkaran may koral nga kawayan, kahoy, alambreng tunokon ug uban pa, nindot pakutayan og mga utanon sama sa batong, paleya, sikwa, o kamoteng bagon, nga kun molabong na sa dahon ug mamunga, pagkabugnaw pamation sa palibot, nga mahanggap ang kalab-as sa oksehena o hangin. Busa angay ta nga magpakabana niini, nga permi hatagan og prayoridad ang alang sa kahimsog sa atong panglawas, pinaagi sa pagpananom.