Nag-inilogay na ang mga kandidato sa pagsang-at sa ilang certificate of candidacy (COC) aron di maabtan sa pagtak-op sa registration period nga gitakda gikan sa Oktobre 1-5, 2012.
Ang unang nagpanikad sa pag-file og COC sa unang adlaw mao kadtong mga bag-ong sulbong nga politiko sa paningkamot nga di maawahi.
Samtang ang mga beterano na kaayo, unya pa sa katapusang mga takna sa Oktubre 5.
Kini tungod kay suhito na kaayo sila sa paagi ug ang taga Comelec nasinati na usab kaayo kanila.
Hinuon wa man kini magpasabot nga tungod kay nakasang-at na og COC sigurado na nga modaug.
Kini tungod kay ang barahan sa tanan mao ang pulso sa katawhan kinsa ang uban mag-agad kun may kuwartang itunol, samtang ang uban mobotar segun sa gisugyot sa ilang konsensya.
Ingon niini ang pagkabahin sa mga botante, apan may matang sa botante nga gitawag nga “wise voter” sa Inenglis pa, nga kun mobotar mogamit og scientific nga pamaagi.
Mobotar tungod kay usa ka sagradong katungdanan ang pagbotar apan mo-survey una sa palibot kun ang ilang botohan dumadaog ba, aron di mausik ang ilang boto.
Apan kun dumadaog unya may atraso sa ilang pundok, aw mangita sila sa kandidato nga ikaduhang dumadaog nga way atraso sa ilang pundok ug maoy ilang kasahan sa ilang boto.
May mga botante nga wa magpaabot nga paliton sa kandidato ang ilang boto ug mobotar segun sa iyang konsensya kay suod niya ang kandidato, bahala na og mapildi.
May botante usab nga di mobotar kun di tunolan og kuwarta sa kandidato. Ang mga malditohong kandidato kusog kaayo molawog og kuwarta sa mga botante sa di pa o sa akto ang election.
Apan ang mga wise nga kandidato unya na manghatag og kuwarta agi og pasalamat sa mga mibotar kanila kun modaog siya, ug mao kini ang hitsura sa atong piniliay sa nasud.