Lawas ang puhonan

Sagad tingali sa mga maayo’g pangutok nga may hingpit usab ang panglawas, makaseguro ta nga may maayo gyud nga makab-ot sa kinabuhi. Kun ang lawas may kabilinggan, may mahimo man gihapon lamang adunay mga kakulian o kinutuban. Nagkinahanglag kaabag aron mapatunhay ang buot niyang buhaton.

Daghan na usab kita og nahibaloan, nga dunay pipila ka mga tawo nga nagmalampuson sa ilang propesyon, sama sa naangkon niadtong may hingpit o normal ang panglawas. Gani kadaghanan nila nagbaton og talagsaong talento nga di sad basta hibintahaan bisan pa man maglisod sila sa ilang paglihok.

Makabentaha gyud ang normal nga way apan ang panglawas, kay makalihok man siya mismo sa iyang kaugalingong gusto nga buhaton.

Maabot niya ang mga katinuoran sa mga pangandoy. May hingpit nga katakos sa panlimbasog. Hamugaway nga way katagbawan. Kanunay mopahimulos og dugang pang mga oportunidad nga kapuslan pa alang sa iyang kaugalingong kalamboan.

Busa ampingi ug atimana pag-ayo ang panglawas. Kay ang lawas mao ang bugtong puhunan sa tanang gusto natong angkonon sa kinabuhi. Ayaw hagoa pag-ayo ang lawas. Hatagi kini og igong panginahanglanon, sama sa husto o masustansyang pagkaon ug ubang bitamina. Ug mag-ehersisyo nga igo lang.  

Kay kun grabe masakit ang lawas, ang atong reserbang puhonan, di na gyud molambo kay mabangkarota man sige’g gasto sa tambal, mamasin mabawi pa ang alkanse nga mugna sa pagpasagad, nga kahatagan untag kahimsog ang lawas.

Hinuon, may paglaom pa nga makabawi kay duna pa man kita’y kinabuhi.