Gilawalawaang mga hinabang

 Haskang daghanang hinabang gikan sa nasudnong gobyerno ug kalibotanong financial institutions nga wa mapahimusli sa daghang katuigan. Tungod ni kay mahimong wa kahibawo ang local government units (LGUs). O kay di kahibawo ang lokal nga mga opisyal pag-detalye sa ilang mga panginahanglan.

Atubangan sa lapad nga katimawa sa katawhan, dako ning eskandalo. Maong nalipay ko sa tanyag sa National Economic and Development Authority (Neda) pagtudlo sa mga representante sa LGUs aron mas dako ang kahigayonan nga mapatuman ang ilang mga proyekto ug kasilbihan ang labing dagkong panginahanglan sa katawhan.

* * *

Matod ni Assistant Regional Director Efren Carreon sa Neda 7 ang lokal nga mga opisyal sa Bohol maoy labing interesado nga makat-on unsaon paghimo og project proposals ug feasibility studies aron makakuha og hinabang gikan sa nasudnong gobyerno ug ubang kanasuran. Ang pagbansay-bansay nga ila nang nahimo sa Bohol gitanyag sab nila sa LGUs sa ubang mga dapit sa rehiyon.

Kun di kalugar ang mga mayor ug mga gobernador, nga mao gyod untay angay’ng masuhito sa mga panginahanglan, mahimong ipada ang provincial, city ug municipal planning and development officers. Mahimo sang representahan ang LGUs sa ilang mga inhinyero.

* * *

Salamat sa hangyo ni Ian Vic Alcuino, Economic Development Specialist (EDS) sa Neda 7, nisugot si Carreon nga mosalmot ang kadagkoan sa Neda sa sunod nga Grand Halad sa Kapamilya, ang labing dakong piyesta sa libreng mga pangalagad sa Sugbo, nga gitakda karong Nobiyembre 10. Mopasiugda sila og seminars sa paghimo og project proposals ug feasibility studies ug ubang nahilambigit nga mga pangalagad.

Mga opisyal ug mga kawani sa gobyerno ang unang gipahinungdan sa ilang pangalagad. Apan hangpon sab nilang Carreon ug kaubanan kun may mga representante sa pribadong mga kompaniya nga motambong sa kalihokan. Palihug paminawa ang dugang detalye sa mosunod nga mga adlaw sa DYAB, nga nahimutang sa 1512 khz sa AM band.

* * *

Tungod sa nagpadayong pagsaulog sa RDC Week, niduaw sa Arangkada sa DYAB gahapon silang Carreon, Alcuino ug Senior EDS Margarito Cabadsan aron pagpasabot sa mga gimbuhaton sa Regional Development Council sa Central Visayas.

Gitaho nila nga ang ekonomiya sa Sugbo maoy labing malambuon sa tibuok nasud niadtong 2010 ug mas malambuon kay sa nasudnong ekonomiya sa niaging tuig. Nga nakahimong mas dakong insulto sa paglansang sa minimum nga suholan sa mga mamumuo sa Sugbo ug sa rehiyon nga nabiyaan na pag-ayo sa Metro Manila.

Di hinuon mas taas nga suholan ang rekomendasyon sa Neda. Kun dili ang pagkatag sa bag-ong mga industriya aron nga di maghuot ug magkaguliyang ang dagkong mga dakbayan. Ug mabahinan sa kalamboan ang lagyong kalungsoran.

* * *

Email: [email protected]