Sa politika anaa ang pangigi

Sa natad sa politika, ang mga politiko sama sa binuhat nga dako’g gugma ngadto sa laing binuhat. Mangigi kun makita nga ang iyang gimahal nga binuhat makigsulti sa laing binuhat. Magselos ug mangaway.

Mao usab niini ang politiko nga nagmahal sa gahom. Dili gusto nga mahanaw kaniya ang iyang gihigugma nga katungdanan o gahom.

Dili malalis ang reyalidad nga ang mga politiko mangigi kun ang iyang gituhoan nga botante iyaha nga makigsulti sa kaatbang niya sa politika. Dili siya gusto nga makigsulti ang iyang lumalaban ngadto sa politiko nga kailog niya sa gipaka-diyos nga gahom.

Daghan ang mga politiko nga ingon niini ilabi na sa kalungsoran. Bisan gani sa dagkong siyudad. Ug ang tawo intawon nga naglikay sa kasamok magkinto nga sa iyang mga lihok aron wala’y ikasaway kaniya ang politiko nga iyang gidapigan.

Ug karon nga nagkaduol na ang eleksiyon, mugawas na usab kining maong matang sa kinaiya sa mga politiko. Dili ra ba gayod malikayan nga adunay mga tawo nga sipsip o tigpalapad sa papel ngadto sa gidapigan nga politiko. Modayo’g pahibalo sa politiko nga nakigsulti ang usa niini ka dumadapig sa kaatbang nga politiko. Ug ang gihisgotang politiko mangigi dayon. Ipatawag ang maong tawo. Sukmatan ug kasab-an.

Pagka-makaluluoy sa tawo nga napiit sa maong matang sa kinaiya sa politiko. Mogawas nga robot na lang intawon siya. Magsunodsunod sa gusto sa gidapigan nga politiko. Apan nganong pugngan man ang usa ka dumadapig sa pagpakigsulti sa kaatbang nga politiko?

Demokrasya baya kining atong gobiyerno.

Lisod usab kining tawo nga adunay utang kabubut-on ngadto sa usa ka politiko. Bisa’g asa biraha ang iyang ilong, pa-wala o pa-tuo, magsunod-sunod na lang. Wala nay dugokan. Wala na’y prinsipyo. Sama sa lusay sa dagat nga mopaundayon sa mga balod.

Ingon niini ang matang sa politika sa atong nasud. Ang mga tawo nga dumadapig kay adunay utang kabubut-on, dili makasupak sa bisan unsang gusto sa politiko. Dili makalingkawas sa pangigi sa politiko.